இன்றைய முக்கிய செய்திகள் சில வரிகளில்.. 20-12-2024
உள்ளூர் முதல் உலகம் வரை இன்று நடைபெறும் முக்கிய நிகழ்வுகளை உடனுக்கு உடன் இங்கே தெரிந்து கொள்ளலாம்.
தி.மு.க. ஆட்சியில் சட்டம் ஒழுங்கு படு பாதாளத்திற்கு சென்றுவிட்டது - எடப்பாடி பழனிசாமி குற்றச்சாட்டு
நீதிமன்ற வாயில்களில் அச்சமின்றி குற்றச்செயல்கள் தொடர்ந்து நடைபெறுவது என்பது மு.க.ஸ்டாலினின் ஆட்சியில் சட்டம் ஒழுங்கு மீள முடியாத அளவிற்கு படு பாதாளத்திற்கு சென்றுவிட்டதன் அத்தாட்சி என எதிர்க்கட்சி தலைவர் எடப்பாடி பழனிசாமி குற்றம்சாட்டியுள்ளார்.
சென்னை ஐஐடி வளாகத்தில் மறைந்த முன்னாள் முதல்-அமைச்சரின் காமராஜரின் மார்பளவு சிலையை ஐஐடி இயக்குநர் காமகோடி திறந்துவைத்தார். சென்னை ஐஐடியை கொண்டு வருவதற்கு காரணமாக இருந்த காமராஜருக்கு சிலை அமைக்கப்பட்டுள்ளது.
இந்திய தேசிய லோக் தள கட்சி தலைவரும் அரியானா முன்னாள் முதல்-மந்திரியுமான ஓம் பிரகாஷ் சவுதாலா (வயது 89) மாரடைப்பால் காலமானார். அரியானா மாநிலம் கூர்கானில் ஓம் பிரகாஷ் சவுதாலாவுக்கு மாரடைப்பு ஏற்பட்டதில் உயிர் பிரிந்தது. 89 வயதான ஓம் பிரகாஷ் சவுதாலா 4 முறை அரியானா முதல்-மந்திரியாக பதவி வகித்தவர் ஆவார். முன்னாள் துணை பிரதமர் சவுதாரி தேவி லாலின் மகன் ஓம் பிரகாஷ் சவுதாலா ஆவார். ஓம் பிரகாஷ் சவுதாலா 1989 முதல் 2005 வரை 4 முறை முதல்-மந்திரியாக பதவி வகித்துள்ளார்.
மராட்டிய மாநிலம் ராய்காட் மாவட்டத்தில் உள்ள தம்ஹினி காட் பகுதியில் பஸ் கவிழ்ந்து விபத்துக்குள்ளானதில் 5 பயணிகள் உயிரிழந்தனர்.
நெல்லை நீதிமன்ற வளாகம் முன்பு மாயாண்டி என்பவர் இன்று காலை வெட்டிக்கொல்லப்பட்ட வழக்கில் 3 பேரை போலீசார் கைது செய்துள்ளனர். கீழநத்தம் பகுதியைச் சேர்ந்த மாயாண்டியை வெட்டிக் கொலை செய்து ஒரு கும்பல் காரில் தப்பிச் சென்ற நிலையில், உடனடி விசாரணை நடத்தி ராமகிருஷ்ணன் உள்பட 3 பேர் கைது செய்யப்பட்டுள்ளனர். கடந்த ஆண்டு கீழநத்தம் பஞ்சாயத்து வார்டு உறுப்பினராக இருந்த ராஜாமணி என்பவர் கொலை செய்யப்பட்டதற்கு பழிக்குப்பழியாக மாயாண்டி கொலை செய்யப்பட்டுள்ளதாக முதற்கட்ட விசாரணையில் தகவல் வெளியாகி உள்ளது.
தமிழக சட்டசபை கூட்டத்தொடர் ஜனவரி 6-ம் தேதி கவர்னர் உரையுடன் தொடங்க உள்ளதாக சபாநாயகர் அப்பாவு கூறியுள்ளார்.
'ஒரே நாடு ஒரே தேர்தல்' மசோதாதாவை நாடாளுமன்ற கூட்டுக் குழுவுக்கு அனுப்ப தீர்மானம் நிறைவேற்றப்பட்டது. மசோதாவை ஆய்வு செய்யும் நாடாளுமன்ற கூட்டுக் குழுவில் பிரியங்கா காந்தி உள்பட 39 பேர் இடம்பெற்றுள்ளனர். தீர்மானம் நிறைவேற்றப்பட்டதை அடுத்து மக்களவை தேதி குறிப்பிடாமல் ஒத்திவைக்கப்பட்டது.
மக்களவை சபாநாயகர் ஓம் பிர்லா வழங்கும் தேநீர் விருந்தை எதிர்க்கட்சி எம்.பி.க்கள் புறக்கணித்துள்ளன. நாடாளுமன்ற கூட்டத்தொடருக்குப்பின் மரப்புப்படி நடைபெறும் தேநீர் விருந்தை எதிர்க்கட்சிகள் கூட்டாக புறக்கணித்துள்ளன. அம்பேத்கர் விவாகாரத்தை சுட்டிக்காட்டி தேநீர் விருந்தை புறக்கணிப்பதாக மாணிக்கம் தாக்கூர் எம்.பி. கூறியுள்ளார்.
அமித்ஷாவை கண்டித்து எதிர்க்கட்சிகள் முழுக்கமிட்டதால் மக்களவை தேதி குறிப்பிடாமல் ஒத்திவைக்கப்பட்டது. இந்தியா கூட்டணி எம்.பி.க்கள் தொடர்ந்து அமளியில் ஈடுபட்டபோது வந்தே மாதரம் பாடலுடன் அவை அலுவல் முடிந்தது. வந்தே மாதரம் பாடல் ஒலித்ததால் முழுக்கத்தில் ஈடுபட்ட எம்.பி.க்கள் அமைதியாக நின்று மரியாதை அளித்தனர். எதிர்க்கட்சிகளின் கடும் அமளி காரணமாக மாநிலங்களவையும் தேதி குறிப்பிடாமல் ஒத்திவைக்கப்பட்டது.
கிருஷ்ணகிரி மாவட்டம் ஒசூர் அருகே மின்சாரம் பாய்ந்து 10வயது சிறுமி உயிரிழந்தார். காட்டு யானைகள் வராமல் தடுக்க வைக்கப்பட்டிருந்த மின் வயரை தொட்டதால் சிறுமி பரிதாபமாக உயிரிழந்துள்ளார். இந்த சம்பவம் குறித்து தேன்கனிக்கோட்டை போலீசார் சம்பவ இடத்தில் விசாரணை நடத்தி வருகின்றனர். சிறுமி திவ்யாஸ்ரீயின் உடலை கைப்பற்றி பிரேத பரிசோதனைக்கு போலீசார் அனுப்பி வைத்தனர்.