எஸ்.எஸ்.எல்.சி. தேர்வில் 93.86 சதவீதம் தேர்ச்சி

ராமநாதபுரம் மாவட்டத்தில் நேற்று வெளியிடப்பட்ட எஸ்.எஸ்.எல்.சி.தேர்வு முடிவில் 93.86 சதவீதம் தேர்ச்சி பெற்றுள்ளன.

93.86 சதவீதம் தேர்ச்சி

தமிழகத்தில் எஸ்.எஸ்.எல்.சி. பொதுத்தேர்வு முடிவுகள் நேற்று காலை வெளியிடப்பட்டன. இதன்படி ராமநாதபுரம் மாவட்டத்தில் எஸ்.எஸ்.எல்.சி. தேர்வினை 8 ஆயிரத்து 11 மாணவர்களும், 8 ஆயிரத்து 287 மாணவிகளும் என மொத்தம் 16 ஆயிரத்து 298 பேர் எழுதி இருந்தனர். தேர்வு முடிவுகளின்படி 7 ஆயிரத்து 292 மாணவர்களும், 8 ஆயிரத்து 5 மாணவிகளும் என மொத்தம் 15 ஆயிரத்து 297 மாணவ, மாணவிகள் தேர்ச்சி பெற்றுள்ளனர். ஒட்டுமொத்தமாக ராமநாதபுரம் மாவட்ட அளவில் 93.86 சதவீதம் தேர்ச்சி பெற்றுள்ளன. மாநில அளவில் ராமநாதபுரம் மாவட்டம் 12-வது இடம் பிடித்துள்ளது. ராமநாதபுரம் மாவட்டத்தில் 137 அரசு பள்ளிகளில் 32 பள்ளிகள் 100 சதவீதம் தேர்ச்சி பெற்றுள்ளன. அரசு உதவி பெறும் 49 பள்ளிகளில் 7 பள்ளிகள் 100 சதவீதம் தேர்ச்சி பெற்றுள்ளன, 75 மெட்ரிக் பள்ளிகளில் 40 பள்ளிகள் 100 சதவீதம் தேர்ச்சி பெற்றுள்ளன.

பிளஸ்-1 தேர்வு

இதேபோல, ராமநாதபுரம் மாவட்டத்தில் பிளஸ்-1 தேர்வினை 6 ஆயிரத்து 548 மாணவர்களும், 7 ஆயிரத்து 393 மாணவிகளுமாக மொத்தம் 13 ஆயிரத்து 941 பேர் எழுதியிருந்தனர். இவர்களில் நேற்று வெளியிடப்பட்ட தேர்வு முடிவுகளின்படி 5 ஆயிரத்து 869 மாணவர்களும், 7 ஆயிரத்து 134 மாணவிகளுமாக மொத்தம் 13 ஆயிரத்து 3 பேர் தேர்ச்சி பெற்றுள்ளனர். இது மாவட்ட அளவில் 93.27 சதவீதம் ஆகும்.