கத்தியால் குத்தி ரவுடி கொலை

சிவமொக்கா:-

ரவுடி கொலை

சிவமொக்கா மாவட்டம் திப்புநகர் பகுதியை சேர்ந்தவர் சையத் ரசீக். சிவமொக்கா போலீஸ் நிலைய ரவுடி பட்டியலில் இவரது பெயர் உள்ளது. இதேபோல பத்ராவதி தாலுகா திப்பலாபுராவை சேர்ந்தவர் சமீர். கடந்த சில ஆண்டுகளாக 2 பேருக்கும் இடையே பணம் கொடுக்கல், வாங்கல் தொடர்பாக தகராறு இருந்து வந்தது.

இந்தநிைலயில் நேற்று முன்தினம் வெளியே சென்று வருவதாக கூறிவிட்டு சென்ற சையது ரசீக் வீடு திரும்பவில்லை. இதனால் சந்தேகம் அடைந்த குடும்பத்தினர் சையது ரசீக்கை தேடி வந்தனர். இந்தநிலையில் நேற்று முன்தினம் இரவு சையது ரசீக் பத்ராவதி கிராமப்புற போலீஸ் எல்லைக்குட்பட்ட திப்பலாபுராவை அடுத்த சவுடரஹள்ளி பகுதியில் கொலை செய்யப்பட்டு கிடப்பதாக போலீசாருக்கு தகவல் கிடைத்தது.

பணத்தகராறு

இதையடுத்து அங்கு சென்ற பத்ராவதி கிராமப்புற போலீசார் உடலை கைப்பற்றி பிரேத பரிசோதனைக்காக சிவமொக்கா அரசு ஆஸ்பத்திரிக்கு அனுப்பி வைத்தனர். பின்னர் இதுகுறித்து விசாரணை நடத்தினர். அந்த விசாரணையில் சையது ரசீக்கிற்கும், சமீருக்கும் இடையே கடந்த 4 ஆண்டாக பணம், கொடுக்கல் வாங்கல் தொடர்பாக தகராறு இருந்து வந்தது தெரிந்தது.

நேற்று முன்தினம் சமீர், சையது ரசீக்கிடம் பணத்தை கொடுப்பதாக கூறி, அழைத்துள்ளார். அதன்படி சையது ரசீக் சென்றார். அப்போது ஏற்பட்ட தகராறில் சமீர், சையது ரசீக்கை கத்தியால் குத்தி கொலை செய்திருப்பதாக தெரியவந்தது. இதுகுறித்து சிவமொக்கா கிராமப்புற போலீசார் வழக்குப்பதிவு செய்து போலீசார் சமீரை தேடி வருகின்றனர்.