டேரில் மிட்செல் அபார சதம் : இங்கிலாந்து அணிக்கு 277 ரன்கள் இலக்கு நிர்ணயித்தது நியூசிலாந்து..!

லண்டன்

இங்கிலாந்து - நியூசிலாந்து அணிகள் இடையிலான முதலாவது டெஸ்ட் கிரிக்கெட் போட்டி லண்டன் லார்ட்சில் நடைபெற்று வருகிறது .'டாஸ்' ஜெயித்து முதலில் பேட் செய்த நியூசிலாந்து அணி பந்து வீச்சுக்கு உகந்த உயிரோட்டமான இந்த ஆடுகளத்தில் 132 ரன்னில் சுருண்டது.

பின்னர் தனது முதல் இன்னிங்சை தொடங்கிய இங்கிலாந்துக்கு நியூசிலாந்து பவுலர்கள் பதிலடி கொடுத்தனர். முதல் நாள் முடிவில் இங்கிலாந்து 7 விக்கெட்டுக்கு 116 ரன்கள் எடுத்திருந்தது. ஒரே நாளில் மொத்தம் 17 விக்கெட்டுகள் சரிந்தன. இந்த நிலையில் 2-வது நாளான நேற்று தொடர்ந்து ஆடிய இங்கிலாந்து அணி அடுத்த 7 ஓவருக்குள் எஞ்சிய 3 விக்கெட்டுகளையும் இழந்து முதல் இன்னிங்சில் 42.5 ஓவர்களில் 141 ரன்னில் ஆல்-அவுட் ஆனது. அதிகபட்சமாக ஜாக் கிராவ்லி 43 ரன்கள் எடுத்தார். எக்ஸ்டிரா வகையில் அந்த அணிக்கு 22 ரன்கள் கிட்டியது. நியூசிலாந்து தரப்பில் டிம் சவுதி 4 விக்கெட்டும், டிரென்ட் பவுல்ட் 3 விக்கெட்டும், கைல் ஜாமிசன் 2 விக்கெட்டும் கைப்பற்றினர்.

அடுத்து 9 ரன் பின்தங்கிய நிலையில் 2-வது இன்னிங்சை தொடங்கிய நியூசிலாந்துக்கு மீண்டும் அதிர்ச்சி காத்திருந்தது. தொடக்க வீரர்கள் வில் யங் 1 ரன்னிலும், டாம் லாதம் 14 ரன்னிலும் நடையை கட்டினர். கேப்டன் வில்லியம்சன் (15 ரன், 34 பந்து) முதல் இன்னிங்ஸ் போலவே புதுமுக வேகப்பந்து வீச்சாளர் மேத்யூ போட்சின் பந்துவீச்சில் விக்கெட்டை பறிகொடுத்தார். டிவான் கான்வேவும் (13 ரன்) தாக்குப்பிடிக்கவில்லை. அப்போது அந்த அணி 56 ரன்னுக்குள் 4 விக்கெட்டுகளை இழந்து தள்ளாடியது. இந்த சூழலில் 5-வது விக்கெட்டுக்கு கைகோர்த்த டேரில் மிட்செல்லும், விக்கெட் கீப்பர் டாம் பிளன்டெல்லும் அணியை சரிவில் இருந்து படிப்படியாக மீட்டனர். ஆட்ட நேர முடிவில் நியூசிலாந்து அணி 4 விக்கெட்டுக்கு 236 ரன்கள் சேர்த்து, மொத்தம் 227 ரன்கள் முன்னிலை பெற்றிருந்தது. மிட்செல் 97 ரன்களுடனும், பிளன்டெல் 90 ரன்களுடனும் களத்தில் உள்ளனர்.

இன்று 3-வது நாள் ஆட்டம் நடைபெற்றது .சிறப்பாக விளையாடிய மிட்செல் சதம் அடித்து அசத்தினார் .தொடர்ந்து விளையாடிய அவர் 108 ரன்களுக்கு ஆட்டமிழந்தார் .அடுத்த பந்தில் காலின் டி கிராண்ட்ஹோம் வந்த வேகத்தில் ரன் எதுவும் எடுக்காமல் வெளியேறினார் .

இதன்பிறகு வந்த வீரர்கள் அடுத்தடுத்து ஆட்டமிழந்தனர் .சதம் அடிப்பார் என எதிர்ப்பப்ர்க்கப்பட் பிளன்டெல் 96 ரன்களுக்கு ஆட்டமிழந்தார் .

இதனால் நியூசிலாந்து அணி 285 ரன்களுக்கு 10 விக்கெட்டுகளையும் இழந்து ஆட்டமிழந்தது .இதனால் இங்கிலாந்து அணிக்கு 277 ரன்கள் இலக்காக நிர்ணயிக்கப்பட்டுள்ளது .277 ரன்கள் இலக்குடன் தொடர்ந்து இங்கிலாந்து அணி விளையாடி வருகிறது .