#லைவ் அப்டேட்ஸ்: போருக்கு மத்தியில் உக்ரைன் சென்ற 4 ஐரோப்பிய நாடுகளின் தலைவர்கள்

அமெரிக்கா பிற நாடுகளை தங்களின் காலனி நாடுகள் போல் நடத்துவதாக ரஷிய அதிபர் புதின் குற்றம் சாட்டியுள்ளர். மேலும், ரஷிய பொருளாதாரம் குறித்த தவறான கணிப்புகள் நிறைவேறவில்லை என்றும் புதின் தெரிவித்துள்ளார்.

சிறிய ஆதாயங்களுக்காக புதின் இராணுவ சக்தியில் கால் பகுதியை தியாகம் செய்து விட்டார்- இங்கிலாந்து

லண்டன்

இங்கிலாந்தின் தலைமை இராணுவ அதிகாரி டோனி ராடகின் கூறியதாவது:-

ரஷியா ஏற்கனவே மூலோபாய ரீதியாக தோற்றுவிட்டது. நேட்டோ வலுவாக உள்ளது. பின்லாந்து மற்றும் சுவீடன் நேட்டோவில் சேர விரும்புகின்றன. ரஷிய அதிபர் விளாடிமிர் புதின் அடுத்த சில வாரங்களில் தந்திரோபாய வெற்றிகளை அடையலாம்.

ஆனால் சிறிய ஆதாயங்களுக்காக அவர் தனது நாட்டின் இராணுவ சக்தியில் கால் பகுதியை தியாகம் செய்து விட்டார். துருப்புக்கள் மற்றும் உயர் தொழிநுட்ப ஏவுகணைகள் இல்லாமல் போய்விட்டன.

ரஷியா ஒவ்வொரு நாளும் குறைந்தது இரண்டு பகுதிகளில் ஐந்து கிலோமீட்டர்கள் முன்னோக்கி சென்று கொண்டிருக்கிறது.ஆனாலும், ரஷியாவிற்கு பாதிப்புகள் உள்ளன, ஏனெனில் ரஷியா தனது படைகளை இழந்து வருகிறது, உயர் தொழில்நுட்ப ஏவுகணைகள் இல்லாமல் இயங்குகிறது.

அதிபர் புதின் தனது ராணுவத்தின் சக்தியில் 25 சதவீதத்தை ஒரு சிறிய அளவிலான நிலப்பரப்பைப் பெற பயன்படுத்தி உள்ளார்.

இங்கிலாந்து நீண்ட காலம் அதிக ஆயுதங்களை உக்ரைனுக்கு வழங்கும் என கூறினார்.

கிழக்கு உக்ரைனில் பெரும்பகுதியை கைப்பற்றிய ரஷியா... ஆயிரக்கணக்கான மக்கள் சிக்கி தவிப்பு..!

கிழக்கு உக்ரைனின் சிவிரோடொனெட்ஸ்க் நகரத்தின் பெரும்பகுதியை ரஷியப் படைகள் கைப்பற்றியுள்ள நிலையில், அந்நகரில் ஆயிரக்கணக்கான பொதுமக்கள் சிக்கித் தவித்து வருவதாக ஐ.நா. தகவல் தெரிவித்துள்ளது.

இதுகுறித்து ஐ.நா.செய்தித் தொடர்பாளர் கூறுகையில், டான்பாஸை கைப்பற்ற சிவிரோடொனெட்ஸ்கில் தொடர் தாக்குதல் நடத்தி வரும் ரஷிய படைகள், அனைத்து பாலங்களையும் தகர்த்து அந்நகரை சுற்றி வளைத்துள்ளதாகவும், அங்குள்ள அசோட் தொழிற்சாலையில் தஞ்சமடைந்துள்ள 500-க்கும் மேற்பட்ட பொதுமக்கள் வெளியேற முடியாமல் தவித்து வருவதாகவும் தெரிவித்தார்.

ரஷிய ஆயுத படகை தாக்கி, அழித்த உக்ரைனிய ஏவுகணைகள்

கீவ்,

ரஷியாவின் ஆயுதம், போர் வீரர்களை ஏற்றி சென்ற படகை உக்ரைனிய ஏவுகணைகள் தாக்கி அழித்துள்ளன.

உக்ரைனுக்கு எதிரான தீவிர போரில் ரஷிய படைகள் தொடர்ந்து முன்னேறி வருகின்றன. இதில், ரஷியாவால் ஆக்கிரமிக்கப்பட்ட உக்ரைனின் ஒடிசா நகருக்கு தெற்கே அமைந்த பாம்பு தீவுக்கு (ஸ்மைனை தீவு) ரஷிய படகு ஒன்று சென்று கொண்டிருந்தது.

அந்த படகை உக்ரைன் நாட்டின் ஏவுகணைகள் தாக்கி அழித்துள்ளன. அந்த படகில் வீரர்கள் இருந்துள்ளனர். ஆயுதங்கள் மற்றும் வெடிபொருட்களும் கொண்டு செல்லப்பட்டு உள்ளன.

இதனை ஒடிசா கவர்னர் மேக்சிம் மார்செனகோ தெரிவித்து உள்ளார். வேசிலி பெக் என பெயரிடப்பட்ட அந்த படகில் ஏவுகணைகளை தடுத்து நிறுத்தும் சாதனம் ஒன்று அமைக்கப்பட்டு உள்ளது. எனினும், ஏவுகணை தாக்குதலை முறியடிக்க அது தவறி விட்டது என உக்ரைனின் கடற்படை தளபதி தெரிவித்து உள்ளார்.

இதுபற்றி தளபதி தனது பேஸ்புக்கில் வெளியிட்ட செய்தியில், கடந்த 2017ம் ஆண்டில் இருந்து ரஷியாவின் கருங்கடல் பகுதியில் இந்த வேசிலி பெக் படகு பயணித்து வந்துள்ளது என தெரிவித்து உள்ளார். உக்ரைனின் இந்த தாக்குதலால் அதன் பயணம் முடிவுக்கு வந்துள்ளது.

உக்ரைனில் மனிதாபிமான நெருக்கடி அதிகரிப்பு: ஐநா ஆணையம்

உக்ரைன் - ரஷியா இடையேயான போர் ஏறத்தாழ 4 மாதங்களாக நடைபெற்று வருகிறது. உக்ரைன் மீது தொடர்ந்து தாக்குதல் நடத்தி வரும் ரஷியா, உக்ரைனின் பல பகுதிகளை கைப்பற்றியுள்ளது. ரஷியாவின் தாக்குதலால் உக்ரைனின் லட்சக்கணக்கான மக்கள் தங்கள் இருப்பிடத்தை விட்டு வெளியேறியுள்ளனர். பலரும் தங்கள் வீடுகள், உடைமகளை இழந்து நிவாரண முகாம்களிலும் அண்டை நாடுகளிலும் தஞ்சம் அடைந்து இருப்பது போரின் கொடூரத்தை காட்டி வருகிறது.

இந்த நிலையில், உக்ரைன் முழுவதும் மனிதாபிமான நெருக்கடி அதிகரித்து இருப்பதாக ஐநா மனித உரிமைகள் ஆணையம் தெரிவித்துள்ளது. குறிப்பாக உக்ரைனின் கிழக்கு டோன்பாஸ் நகரில் நிலைமை மிகவும் மோசமாக இருப்பதாகவும் தெரிவிக்கப்பட்டுள்ளது.