தொடரும் இஸ்ரேல்-ஹமாஸ் போர்: பலி எண்ணிக்கை 8 ஆயிரத்து 500ஐ கடந்தது

இஸ்ரேலில் ஹமாஸ் திடீர் ராக்கெட் தாக்குதல்

இஸ்ரேலின் டெல் அவிவ் நகரில், குடியிருப்பு பகுதிகள் மீது ஹமாஸ் ராக்கெட் குண்டுகள் மூலம் தாக்குதல் நடத்தி உள்ளது. குடியிருப்பு பகுதிகள் மீது ராக்கெட் குண்டு விழுந்த காட்சிகள் வெளியாகி பரபரப்பை ஏற்படுத்தி உள்ளது.

மத்திய கிழக்குப்பகுதியில் 900 வீரர்கள் நிலைநிறுத்தபட்டுள்ளனர் என்று பெண்டகன் தெரிவித்துள்ளது.

சர்வதேச சட்டத்தை மீறும் உரிமை இஸ்ரேல் உட்பட எந்த நாட்டுக்கும் இல்லை. இஸ்ரேல் மற்றும் காசாவில் ஏற்கனவே ஆயிரக்கணக்கான அப்பாவி பொதுமக்கள் கொல்லப்பட்டுள்ளனர். மனிதாபிமான நெருக்கடி மேலும் மோசமடையும் நிலையில், நான் போர் நிறுத்தத்திற்கு அழைப்பு விடுக்கிறேன் என லண்டன் மேயர் சாதிக் கான் வீடியோவில் கூறியுள்ளார்.

Thousands of innocent civilians have already been killed in Israel and Gaza.

With the humanitarian crisis set to deteriorate even further, I’m calling for a ceasefire.pic.twitter.com/9HPau9X9jP

— Sadiq Khan (@SadiqKhan) October 27, 2023

காசா முற்றுகையால் மேலும் பலர் உயிரிழப்பார்கள்: ஐ.நா கவலை

காசா பகுதியில் இஸ்ரேல் நடத்தி வரும் முழு தாக்குதல் விளைவாக இன்னும் பலர் இறக்க நேரிடும் என்று ஐக்கிய நாடுகள் சபை எச்சரித்துள்ளது. இஸ்ரேல் தாக்குதலால் அடிப்படை சேவைகள் முடங்கி வருகின்றன. மருந்து தீர்ந்து வருகிறது, உணவு மற்றும் தண்ணீர் தீர்ந்து வருகிறது, காசாவின் தெருக்களில் கழிவுநீர் நிரம்பி வழிகிறது என ஐ.நா. கவலை தெரிவித்துள்ளது.

போர் நிறுத்தம் அறிவிக்கப்படாதவரை பணயக்கைதிகளை விடுவிக்கமாட்டோம் - ஹமாஸ்

இஸ்ரேல் - ஹமாஸ் இடையேயான போர் 21வது நாளாக நீடித்து வருகிறது. இதனிடையே, ஹமாஸ் ஆயுதக்குழுவின் மூத்த நிர்வாகிகள் ரஷியாவுக்கு சென்றுள்ளனர்.

இந்நிலையில், போர் நிறுத்தம் அறிவிக்கப்படாதவரை பிணைக்கைதிகளை விடுவிக்கமாட்டோம் என்று ஹமாஸ் ஆயுதக்குழு தெரிவித்துள்ளது. ரஷிய செய்தி நிறுவனத்திற்கு பேட்டியளித்த ஹமாஸ் ஆயுதக்குழு நிர்வாகி அபு ஹமித், போர் நிறுத்த ஒப்பந்தம் எற்படாதவரை பிணைக்கைதிகள் விடுதலை செய்யப்படப்போவதில்லை. காசாவில் இஸ்ரேல் நடத்திய வான்வழி தாக்குதலில் பிணைக்கைதிகளில் 50 பேர் உயிரிழந்துள்ளனர்’ என்றார்.

வடக்கு காசா எல்லைக்குள் நுழைந்து இஸ்ரேல் தரைவழி தாக்குதல்

வடக்கு காசா எல்லைக்குள் நேற்று இரவு நுழைந்த இஸ்ரேல் தரைவழி தாக்குதல் நடத்தியுள்ளது. காசா முனையின் பெட் ஹனொன் மற்றும் அல்புரிஜி அகதிகள் முகாமில் இஸ்ரேல் தரைவழி தாக்குதல் நடத்தியது. இந்த தாக்குதலில் ஏற்பட்ட பாதிப்பு விவரம் இதுவரை வெளியாகவில்லை.

பலி எண்ணிக்கை:

இஸ்ரேல் - ஹமாஸ் இடையேயான போரில் உயிரிழந்தோர் எண்ணிக்கை 8 ஆயிரத்து 500-ஐ கடந்துள்ளது. இஸ்ரேல் மீது ஹமாஸ் நடத்திய தாக்குதலில் இதுவரை 1,405 பேர் கொல்லப்பட்டுள்ளனர்.

இந்த தாக்குதலுக்கு பதிலடியாக பாலஸ்தீனத்தின் காசா முனை மீது இஸ்ரேல் நடத்திய தாக்குதலில் இதுவரை 7 ஆயிரத்து 28 பேர் உயிரிழந்துள்ளனர். அதேபோல், பாலஸ்தீனத்தின் மேற்குகரை பகுதியில் நடந்த மோதலில் இதுவரை 107 பேர் உயிரிழந்துள்ளனர். இதன் மூலம் இஸ்ரேல்-ஹமாஸ் இடையேயான போரில் உயிரிழந்தோர் எண்ணிக்கை 8 ஆயிரத்து 540 ஆக அதிகரித்துள்ளது.

21வது நாளாக தொடரும் போர்:

இஸ்ரேல் மீது கடந்த 7ம் தேதி ஹமாஸ், பாலஸ்தீனியன் இஸ்லாமிக் ஜிகாத் போன்ற ஆயுதக்குழுவினர் பயங்கரவாத தாக்குதல் நடத்தினர். இந்த பயங்கரவாத தாக்குதலை தொடர்ந்து காசாவில் உள்ள ஹமாஸ் ஆயுதக்குழு மீது இஸ்ரேல் போர் அறிவித்தது. இரு தரப்பும் மோதலில் ஈடுபட்டுள்ள நிலையில் போர் இன்று 21வது நாளாக நீடித்து வருகிறது.