6 முதல் 9-ம் வகுப்பு மாணவர்களுக்கு முன்கூட்டியே தேர்வு நடத்த வேண்டும்-தமிழ்நாடு ஆசிரியர் கழகம் கோரிக்கை

தமிழ்நாடு மேல்நிலைப்பள்ளி முதுநிலைப்பட்டதாரி ஆசிரியர் கழக மாநில தலைவர் இளங்கோவன் தமிழக பள்ளி கல்வித்துறை ஆணையர் மற்றும் அரசு தேர்வுகள் துறை இயக்குனர் ஆகியோருக்கு அனுப்பியுள்ள மனுவில் கூறியுள்ளதாவது:-

மேல்நிலை வகுப்புகளுக்கான அரசு பொதுத் தேர்வுகள் மார்ச் 13-ந்தேதி முதல் ஏப்ரல் 5-ந்தேதி வரை நடைபெற்று வருகிறது. மேலும் 10-ம் வகுப்பு அரசு பொதுத் தேர்வுகள் ஏப்ரல் 6-ந்தேதி முதல் 20-ந்தேதி வரை நடைபெற அறிவிக்கப்பட்டுள்ளது. இதுதவிர ஏப்ரல் 23-ந்தேதி முதல் 10-ம் வகுப்பு விடைத்தாள் திருத்தும் பணி நடைபெற உள்ளது.

இந்நிலையில் 6 முதல் 9-ம் வகுப்பு வரை ஆண்டு இறுதி தேர்வுகள் ஏப்ரல் 20-ந்தேதி முதல் 28-ந்தேதி வரை நடத்தப்படும் என்று அறிவிக்கப்பட்டுள்ளது.

இந்த நாட்களில் முதுநிலை பட்டதாரி ஆசிரியர்களும் பட்டதாரி ஆசிரியர்களும் விடைத்தாள் திருத்தும் பணியில் இருப்பார்கள். அப்போது 6 முதல் 9-ம் வகுப்பு வரை உள்ள மாணவர்களுக்கு முறையாக தேர்வுகளை யாரை வைத்து நடத்துவது.

இதற்கு மாற்றாக 10-ம் வகுப்பிற்கு தேர்வுகள் இல்லாத பள்ளி வேலை நாட்களான ஏப்ரல் 7, 11, 12, 14, 18, 19 மற்றும் 21-ந்தேதி ஆகிய நாட்களில் தேர்வுகள் நடத்தி ஏப்ரல் 24-ந்தேதி முதல் 28-ந்தேதி வரை ஏனைய பள்ளி பணிகளை மேற்கொள்ள நடவடிக்கை எடுக்க வேண்டுமென கேட்டுக்கொள்கிறேன்.

இவ்வாறு அந்த மனுவில் அவர் கூறியுள்ளார்.