ஓசூரில் பதுங்கியிருந்த கைதியை டெல்லி போலீசார் பிடித்தனர்

ஓசூர்:

தெலுங்கானா மாநிலம் ஐதராபாத் அருகே ரங்காரெட்டியை சேர்ந்தவர் அனமல குண்டம் சோமசேகர் (வயது40). இவருக்கு சொர்ணா (40) என்ற மனைவியும், 4 வயதில் ஒரு மகளும் உள்ளனர். சொர்ணாவை அவர் 2 ஆண்டுகளுக்கு முன்பு 2-வது திருமணம் செய்து கொண்டதாக கூறப்படுகிறது. டெல்லி திகார் ஜெயிலில், சிறை கைதியாக இருந்த சோமசேகர் கடந்த ஆண்டு மார்ச் மாதம் 28-ந்தேதி பரோலில் வெளியே வந்தார். பின்னர், வழக்கில் ஆஜராகாமல் அவர் தலைமறைவானார். இந்தநிலையில் ஓசூர் மூக்கண்டப்பள்ளி பாரதி நகர் பகுதியில் அவர் பதுங்கி இருந்ததை அறிந்த டெல்லி போலீசார், ஓசூர் வந்து சோமசேகரை சுற்றி வளைத்து பிடித்தனர். பின்னர் அவரை ஓசூர் சிப்காட் போலீஸ் நிலையத்திற்கு அழைத்து சென்றனர். இதனை தொடர்ந்து, மாஜிஸ்டிரேட் முன்னிலையில் ஆஜர்படுத்திய பின்னர் அவரை டெல்லி அழைத்து சென்றனர்.