நீலகிரி யங் ஸ்டார்ஸ் அணி வெற்றி

கோத்தகிரி

கோத்தகிரி காந்தி மைதானத்தில் தமிழக கால்பந்து வீரர் மகேஷ் நினைவுக் கோப்பைக்கான ஐவர் கால்பந்து போட்டிகள் நேற்று தொடங்கியது. நீலகிரி மாவட்டத்தின் பல்வேறு பகுதிகளில் இருந்து 20-க்கும் மேற்பட்ட அணிகள் கலந்துகொண்டு உள்ளன. ஒரு அணியில் தலா 5 வீரர்கள் மட்டுமே விளையாடும் இந்த போட்டியின் முதல் ஆட்டத்தில் பேட்டலாடா அணியும், மேல் அனையட்டி அணியும் மோதியது. இதில் சிறப்பாக விளையாடிய பேட்டலாடா அணி 4-1 என்கிற கோல்கள் கணக்கில் வெற்றி பெற்றது. தொடர்ந்து நடைபெற்ற மற்றொரு போட்டியில் ஊட்டி நீலகிரி யங் ஸ்டார்ஸ் அணியும், ஜக்கனாரை அணியும் விளையாடின. இதில் நீலகிரி யங் ஸ்டார்ஸ் அணி 4-2 என்கிற கோல்கள் கணக்கில் வெற்றி பெற்றது. அடுத்த போட்டி ஊட்டி ஆர்.எம்.எப்.சி.-ஹில்ஸ் கிங் அணிகளுக்கு இடையே நடைபெற்றது. இதில் ஊட்டி ஆர்.எம்.எப்.சி. அணி 8-2 என்ற கோல்கள் கணக்கில் அபார வெற்றி பெற்றது. வெற்றி பெற்ற 3 அணிகளும் அடுத்த சுற்று போட்டிக்கு தகுதி பெற்றது.