மானியத்தில் உளுந்து, தென்னங்கன்றுகள் பெற விவசாயிகள் விண்ணப்பிக்கலாம்

தாயில்பட்டி,

தாயில்பட்டி, வெம்பக்கோட்டை, கங்கரகோட்டை, இனாம்ரெட்டியபட்டி ஆகிய ஊராட்சிகளில் கலைஞரின் அனைத்து கிராம ஒருங்கிணைந்த வேளாண்மை வளர்ச்சித்திட்டம் செயல்படுத்தப்பட உள்ளது. இத்திட்டம் முதல்-அமைச்சரால் தொடங்கி வைக்கப்பட உள்ளது. அதே சமயத்தில் இக்கிராமங்களை சேர்ந்த அனைத்து விவசாயிகள் மற்றும் குடும்பங்களுக்கு வேளாண்மை மற்றும் தோட்டக்கலை துறை சார்பாக பல்வேறு இடுபொருட்கள் வழங்க உள்ளனர். வேளாண் துறை சார்பாக 100 சதவீத மானியத்தில் 200 குடும்பங்களுக்கு தலா 3 தென்னங்கன்றுகள் வீதம் 600 தென்னங்கன்றுகள், 75 சதவீத மானியத்தில் வரப்பு பயிர் சாகுபடிக்கு ஒரு எக்டேருக்கு 5 கிலோ உளுந்து வீதம் 15 விவசாயிகளுக்கும், கிராமத்திற்கு 5 விசைத்தெளிப்பான், 50 சதவீத மானியத்திலும் 5 கைத்தெளிப்பான், ரூ.750 மானியம் வழங்கப்பட உள்ளது. இதற்கான பயனாளிகள் பட்டியல் விவசாயிகளிடம் இருந்து விண்ணப்பங்கள் பெறப்பட்டு தற்போது வேளாண்மைத்துறை மூலம் தயாரிக்கப்பட்டு வருகிறது. விவசாயிகள் யாரேனும் விடுபட்டிருந்தால் உடனடியாக வெம்பக்கோட்டை வேளாண்மைத்துறையை அணுகலாம். மேற்கண்ட தகவலை வேளாண்மை உதவி இயக்குனர் ஜோதிபாசு கூறினார்.