போதை பொருள் தடுப்பு விழிப்புணர்வு நிகழ்ச்சி

கடலூர் மாவட்டத்தில் போதை பொருள் தடுப்பு குறித்து போலீசார் பள்ளி, கல்லூரி மற்றும் பொதுமக்களிடம் கடந்த சில நாட்களாக விழிப்புணர்வு ஏற்படுத்தி வருகின்றனர். அந்த வகையில் பரங்கிப்பேட்டை அருகே சின்னூர் மீனவ கிராமத்தில் விழிப்புணர்வு நிகழ்ச்சி நடந்தது. நிகழ்ச்சிக்கு போலீஸ் சப்-இன்ஸ்பெக்டர் சிவராமன் தலைமை தாங்கி, மீனவ கிராம மக்களிடம் போதை பொருட்களினால் ஏற்படும் தீமைகள் குறித்து விளக்கி கூறினார். மேலும் யாரேனும் போதை பொருட்கள் விற்பது பற்றி தெரியவந்தால், உடனே போலீசாருக்கு தகவல் அளிக்க வேண்டும் என்று அறிவுறுத்தினர். இதில் மீனவ கிராம மக்கள் பலர் கலந்து கொண்டனர்.

இதேபோல் கடலூர் மஞ்சக்குப்பம் செயின்ட் ஜோசப் கலைக்கல்லூரி, சிங்காரத்தோப்பு, தூக்கணாம்பாக்கம், தென்னம்பாக்கம், புதுச்சத்திரம், வயலாமூர், பரங்கிப்பேட்டை, புதுப்பேட்டை, முத்தாண்டிக்குப்பம் உள்ளிட்ட பகுதிகளிலும் நேற்று போதை தடுப்பு விழிப்புணர்வு நிகழ்ச்சி நடைபெற்றது.