ஊரக உள்ளாட்சி அமைப்புகளுக்கான இடைத்தேர்தலில் 5,516 பேர் வாக்களிக்க உள்ளனர்

இடைத்தேர்தல்

பெரம்பலூர் மாவட்டத்தில் ஊரக உள்ளாட்சி அமைப்புகளில் காலியாக உள்ள பெரம்பலூர் ஒன்றிய மேலப்புலியூர் கிராம ஊராட்சி தலைவர் பதவி, ஆலத்தூர் ஒன்றிய இரூர் கிராம ஊராட்சி 1-வது வார்டு உறுப்பினர் பதவி, பிலிமிசை கிராம ஊராட்சி 4-வது வார்டு உறுப்பினர் பதவி, வேப்பந்தட்டை ஒன்றிய வி.களத்தூர் கிராம ஊராட்சி 7-வது வார்டு உறுப்பினர் பதவி, வேப்பூர் ஒன்றிய கீழப்புலியூர் கிராம ஊராட்சி 8-வது வார்டு உறுப்பினர் பதவி ஆகிய பதவியிடங்களுக்கு வருகிற 9-ந்தேதி இடைத்தேர்தல் நடைபெறுவதாக தமிழக தேர்தல் ஆணையம் அறிவித்தது. அதற்கான வேட்பு மனு தாக்கல் கடந்த மாதம் 20-ந்தேதி தொடங்கி 27-ந்தேதியுடன் நிறைவடைந்தது.

இதில் கீழப்புலியூர் ஊராட்சி 5-வது வார்டு உறுப்பினர் பதவி, இரூர் ஊராட்சி 1-வது வார்டு உறுப்பினர் பதவி ஆகிய பதவிகளுக்கு உறுப்பினர்கள் போட்டியின்றி தேர்வு செய்யப்பட்டதால், அந்த பகுதிகளில் வருகிற 9-ந்தேதி இடைத்தேர்தல் நடைபெறாது.

தேர்தல் பிரசாரம்

மேலப்புலியூர் கிராம ஊராட்சி தலைவர் பதவிக்கு 3 பேரும், பிலிமிசை ஊராட்சி 4-வது வார்டு உறுப்பினர் பதவிக்கும், வி.களத்தூர் ஊராட்சி 7-வது வார்டு உறுப்பினர் பதவிக்கும் தலா 2 பேரும் போட்டியிடுகின்றனர். இதனால் அந்தப்பகுதிகளில் தேர்தல் பிரசாரம் களை கட்டியுள்ளது. மேலப்புலியூர் கிராம ஊராட்சியில் நடைபெறவுள்ள கிராம ஊராட்சி தலைவர் பதவிக்கான தேர்தலில் 2,424 ஆண் வாக்காளர்களும், 2,505 பெண் வாக்காளர்களும் வாக்களிக்க உள்ளனர். பிலிமிசை கிராம ஊராட்சி வார்டு எண் 4-ல் 105 ஆண் வாக்காளர்களும், 112 பெண் வாக்காளர்களும் வாக்களிக்க உள்ளனர். வி.களத்தூர் கிராம ஊராட்சி வார்டு எண் 7-ல் 166 ஆண் வாக்காளர்களும், 204 பெண் வாக்காளர்களும் வாக்களிக்க உள்ளனர்.

பெரம்பலூர் மாவட்டத்தில் ஒரு கிராம ஊராட்சி தலைவர் மற்றும் 2 ஊராட்சி வார்டு உறுப்பினர் பதவியிடங்களுக்கான இடைத்தேர்தலில் 2,695 ஆண் வாக்காளர்களும், 2,821 பெண் வாக்காளர்களும் என மொத்தம் 5,516 வாக்காளர்கள் வாக்களிக்க உள்ளனர். அந்தபகுதிகளில் வருகிற 9-ந்தேதி காலை 7 மணி முதல் மாலை 6 மணி வரை வாக்குப்பதிவு நடைபெறவுள்ளது.

வாக்கு எண்ணிக்கை

12-ந்தேதி காலை 8 மணி முதல் வாக்கு எண்ணிக்கை நடைபெறும். 14-ந்தேதி தேர்தல் நடைமுறைகள் முடிவுபெறும். தமிழ்நாடு மாநில தேர்தல் ஆணையத்தால் தெரிவிக்கப்பட்டுள்ள அனைத்து வழிமுறைகளையும் பின்பற்றி பெரம்பலூர் மாவட்ட ஊரக உள்ளாட்சி அமைப்புகளில் காலியாக உள்ள பதவியிடங்களுக்கு இடைத்தேர்தல் நடத்த முன்னேற்பாடு பணிகள் மும்முரமாக நடைபெற்று வருகிறது.