மராட்டிய அரசு 100 மீட்டர் ஓட்டப் பந்தயத்தில் ஓடும் '3 கால் விலங்கு' - ப.சிதம்பரம் கடும் விமர்சனம்

மும்பை,

மராட்டிய கூட்டணி அரசு 100 மீட்டர் ஓட்டப் பந்தயத்தில் ஓடும் '3 கால் விலங்கு' என ப.சிதம்பரம் விமர்சித்து உள்ளார்.

ப.சிதம்பரம் விமர்சனம்

மராட்டியத்தில் சிவசேனா-பா.ஜனதா கூட்டணி அரசில் அஜித்பவார் தலைமையில் பிளவுபட்ட தேசியவாத காங்கிரஸ் இணைந்து உள்ளது. அஜித்பவார் துணை முதல்-மந்திரியாகவும், அவரது ஆதரவு எம்.எல்.ஏ.க்கள் 8 பேர் மந்திரிகளாகவும் கடந்த 2-ந் தேதி பதவி ஏற்றனர். ஆனால் அவர்களுக்கு இன்னமும் இலாகா ஒதுக்கப்படாமல் உள்ளது. இந்தநிலையில் மராட்டிய அரசை கடுமையாக விமர்சித்து முன்னாள் மத்திய மந்திரி ப.சிதம்பரம் டுவிட்டரில் பதிவிட்டு உள்ளார். அதில் அவர் கூறியிருப்பதாவது:-

'3 கால் விலங்கு'

முதல்-மந்திரியும், 2 துணை முதல்-மந்திரிகளும் தங்களது அரசு, 3 என்ஜின் அரசு என கூறுகின்றனர். ஆனால் எனக்கு அது 100 மீட்டர் ஓட்டப் பந்தயத்தில் 3 கால் விலங்கு ஓடுவது போல தோன்றுகிறது. இலாகா ஒதுக்காததால் மராட்டியத்தில் புதிய 9 மந்திரிகள் வேலையில்லாமல் உள்ளனர். தேவேந்திர பட்னாவிஸ் உள்பட 20 மந்திரிகளில் யாரும் அவர்களது இலாகாவை விட்டு கொடுக்க தயாராக இல்லை. இதற்கு ஒரு தீர்வு உள்ளது. 9 புதிய மந்திரிகளும், இலாகா இல்லாத மந்திரிகள் என அறிவிக்க வேண்டும். 9 பேரும் மந்திரி பதவிக்காக தான் அரசில் இணைந்தார்கள். இலாகாவுடன் தான் அவர்கள் மந்திரிகளாக இருக்க விரும்புகிறார்கள் என யார் கூறியது?. இவ்வாறு அவர் கூறியுள்ளார்.