பீகார்: மத ஊர்வலத்தின்போது பாலஸ்தீன கொடியை ஏந்திச்சென்ற 3 பேர் கைது - போலீசார் அதிரடி
![பீகார்: மத ஊர்வலத்தின்போது பாலஸ்தீன கொடியை ஏந்திச்சென்ற 3 பேர் கைது - போலீசார் அதிரடி பீகார்: மத ஊர்வலத்தின்போது பாலஸ்தீன கொடியை ஏந்திச்சென்ற 3 பேர் கைது - போலீசார் அதிரடி](https://media.dailythanthi.com/h-upload/2024/07/15/3997289-gf.webp)
மத ஊர்வலத்தின்போது பாலஸ்தீன கொடியை ஏந்திச்சென்ற 3 பேரை போலீசார் கைது செய்தனர்.
பாட்னா,
இஸ்லாமிய மத பண்டிகையான மொஹரத்தை முன்னிட்டு பீகார் மாநிலம் நவாடா மாவட்டம் தமுலா பகுதியில் நேற்று இஸ்லாமிய மத ஊர்வலம் நடைபெற்றது. இந்த ஊர்வலத்தில் ஏராளமான இஸ்லாமிய மதத்தினர் பங்கேற்றனர்.
இந்நிலையில், மத ஊர்வலம் நடைபெற்றுக்கொண்டிருந்தபோது அதில் பங்கேற்ற 3 பேர் பாலஸ்தீன கொடியை ஏந்திச்சென்றனர்.
இது தொடர்பான வீடியோக்கள் சமூகவலைதளத்தில் வைரலானது. இதையடுத்து, இச்சம்பவம் தொடர்பாக வழக்குப்பதிவு செய்த போலீசார், மத ஊர்வலத்தில் உரிய அனுமதியின்றி பாலஸ்தீன கொடியை ஏந்திச்சென்ற 3 பேரை கைது செய்தனர். மேலும், பாலஸ்தீன கொடியையும் பறிமுதல் செய்தனர். இந்த சம்பவம் தொடர்பாக தொடர்ந்து விசாரணை நடைபெற்று வருகிறது.
இஸ்ரேல் - ஹமாஸ் இடையேயான போரில் காசா முனையில் ஹமாஸ் ஆயுதக்குழுவினர், பொதுமக்கள் உள்பட 38 ஆயிரத்திற்கும் அதிகமான பாலஸ்தீனர்கள் உயிரிழந்துள்ளனர் என்பது குறிப்பிடத்தக்கது.