மத்திய நிதியமைச்சகத்திடமிருந்து வருவாய் பற்றாக்குறை மானியமாக 14 மாநிலங்களுக்கு ரூ.7,183.42 கோடி விடுவிப்பு!

புதுடெல்லி,

மத்திய நிதியமைச்சகத்தின் கீழ் உள்ள செலவினத்துறை 14 மாநிலங்களுக்கு, வருவாய் பற்றாக்குறை மானியமாக ரூ.7,183.42 கோடியை இன்று விடுவித்தது. 15-ஆவது நிதிக் குழுவின் பரிந்துரையின்படி, இந்த மானியம் விடுவிக்கப்பட்டுள்ளது.

நடப்பு நிதியாண்டில் 14 மாநிலங்களுக்கு ரூ.86,201 கோடியை வழங்குமாறு 15ஆவது நிதிக்குழு பரிந்துரைத்துள்ளது. 12 மாத தவணைகளாக இதனை வழங்க செலவினத்துறை பரிந்துரை அளித்துள்ளது. இம்மாதத்தில் 8-ஆவது தவணையுடன் சேர்த்து நடப்பு நிதியாண்டில் இதுவரை மொத்தம் ரூ.57,467.33 கோடி விடுவிக்கப்பட்டுள்ளது.

ஆந்திரப்பிரதேசம், அசாம், இமாசலப்பிரதேசம், கேரளா, மணிப்பூர், மேகாலயா, மிசோரம், நாகாலாந்து, பஞ்சாப், ராஜஸ்தான், சிக்கிம், திரிபுரா, உத்தராகண்ட் மற்றும் மேற்கு வங்க மாநிலங்களுக்கு இந்த மானியம் அளிக்கப்பட்டுள்ளது.