சொந்த செலவில் நூலகம் அமைத்த ஆசிரியை

நான் பிறந்து வளர்ந்தது விருத்தாசலம். தற்போது சிதம்பரத்தில் வசிக்கிறேன். என் பெற்றோர் ராமலிங்கம்-சாந்தி. அறிவியலில் முதுகலைப் பட்டமும், கல்வியியலில் இளங்கலைப் பட்டமும் முடித்திருக்கிறேன். கணவர் இலங்கேசன் ஆசிரியராகப் பணியாற்றுகிறார். எங்களுக்கு மகனும், மகளும் உள்ளனர்.

எனது வகுப்பறையை முழு சுதந்திரம் பெற்ற சூழலுடன், உயிரோட்டம் பெற்றதாக மாற்றுவதற்கு அன்பின் அடிப்படையில் குழந்தைகளை வழிநடத்திச் செல்கிறேன். படைப்பாற்றல் மிகுந்த, சமூக அக்கறை நிரம்பிய, மனித நேயம் கொண்ட மாணவர்களை உருவாக்கத் திட்டமிடுகிறேன்.

அவர்களது அறிவை விசாலமாக்குவதற்கு களப்பயணங்கள், நாடகங்கள், விவாதங்கள், கதை கூறுதல், எழுதுதல் போன்றவற்றிற்கு வாய்ப்புகள் ஏற்படுத்தித் தருகிறேன். இதன் மூலம் கல்வி, திணிப்பாக இல்லாமல் மகிழ்ந்து கற்பதாக இருக்கிறது.

சிதம்பரம் அருகேயுள்ள எங்கள் ஊரான ‘தில்லை நாயகபுரம்’ கிராமத்தில், பெரும்பான்மையான மக்கள் சமூக அமைப்பிலும், பொருளாதாரத்திலும் பின்தங்கி உள்ளனர். கல்வியறிவு மட்டும்தான் அவர்களைக் கரை சேர்க்கும் ஆயுதம் என்பதால்,  நூலகம் அமைத்தேன். பொதுமக்களும், மாணவர்களும் நூலகத்தைச் சரியாக பயன்படுத்துவதற்கு வசதியாக, பெண் ஒருவரை நூலகராக நியமித்து அவருக்கு மாத ஊதியம் வழங்கி வருகிறேன்.

மூன்று ஆண்டுகளுக்கு முன்பு நூலகம் தொடங்கியபோது பலரும் எதிர்மறையாக பேசினார்கள். ஆனால் துணிந்து செயலில் இறங்கினேன். அதன் பயனாக நூலகத்தின் பக்கம் திரும்பிக்கூட பார்க்காத நபர்களும், இன்று தினமும் நூலகம் வந்து நாளேடுகளைப் படிப்பது மகிழ்ச்சி அளிக்கிறது. பள்ளி, கல்லூரி மாணவர்களும் விடுமுறை நாட்களில் நூலகத்தைத் தேடி வந்து பயனடைகிறார்கள்.

தகுதியும், திறமையும் இருந்தும் மேற்படிப்பைத் தொடர முடியாத மாணவர்களுக்குப் பொருளாதார உதவிகளையும், கல்வி வழிகாட்டுதலையும், தையல் போன்ற கைவினைப் பயிற்சிகளையும் அளிக்கிறோம்.