தென் ஆப்பிரிக்காவுக்கு எதிரான 2-வது டெஸ்ட்: இன்னிங்ஸ் தோல்வியை தவிர்க்க பாகிஸ்தான் போராட்டம்
பாகிஸ்தான் முதல் இன்னிங்சில் 194 ரன்களில் ஆல் அவுட் ஆகி பாலோ ஆன் ஆனது.;
கேப்டவுன்,
தென் ஆப்பிரிக்கா - பாகிஸ்தான் இடையிலான 2-வது மற்றும் கடைசி டெஸ்ட் கேப்டவுனில் கடந்த 3-ம் தேதி தொடங்கியது. இதில் முதல் இன்னிங்சில் முறையே தென் ஆப்பிரிக்கா 615 ரன்களும், பாகிஸ்தான் 194 ரன்களும் அடித்தன.
இதனையடுத்து பாலோ ஆன் ஆன நிலையில் தொடர்ந்து 2-வது இன்னிங்சை தொடங்கிய பாகிஸ்தான் அணிக்கு தொடக்க ஆட்டக்காரர்களாக ஷான் மசூத் மற்றும் பாபர் அசாம் களமிறங்கினர். இருவரும் சூப்பராக விளையாடி முதல் விக்கெட்டுக்கு 205 ரன்கள் பார்ட்னர்ஷிப் அமைத்து அசத்தினர். பாபர் அசாம் 81 ரன்களில் ஆட்டமிழந்தார்.
3-வது நாள் முடிவில் பாகிஸ்தான் 1 விக்கெட்டை இழந்து 213 ரன்கள் அடித்துள்ளது. ஷான் மசூத் 102 ரன்களுடனும், குர்ரம் ஷசாத் 8 ரன்களுடனும் களத்தில் உள்ளனர். பாகிஸ்தான் அணி இன்னிங்ஸ் தோல்வியை தவிர்க்க இன்னும் 208 ரன்கள் அடித்தாக வேண்டும் என்ற நிலையில் போராடி வருகிறது. அந்த சூழலில் 4-வது நாள் ஆட்டம் இன்று நடைபெற உள்ளது.