சாம்பியன்ஸ் டிராபி தொடர்; இந்திய அணியில் சாம்சன் இடம் பெறுவாரா..? - வெளியான தகவல்

புதுடெல்லி,

8 அணிகள் கலந்து கொள்ளும் சாம்பியன்ஸ் டிராபி கிரிக்கெட் தொடர் அடுத்த மாதம் 19-ந் தேதி தொடங்கி மார்ச் 9-ந் தேதி வரை நடக்கிறது. இந்த தொடருக்கான அணிகளை வரும் 12-ந் தேதிக்குள் அறிவிக்க வேண்டும் என ஐ.சி.சி தெரிவித்துள்ளது. இதனால் இந்திய அணியில் யார்? யார்? இடம்பெறுவார்கள் என்ற பெரும் எதிர்பார்ப்பு ரசிகர்களிடையே எழுந்துள்ளது.

இந்திய டி20 அணியில் தொடக்க வீரராக அதிரடி ஆட்டத்தை வெளிப்படுத்தி வரும் சஞ்சு சாம்சனுக்கு சாம்பியன்ஸ் டிராபி தொடரில் இடம் கிடைக்குமா என கேள்வி எழும்பி உள்ளது. இந்நிலையில் சாம்பியன்ஸ் டிராபி தொடருக்கான இந்திய அணியில் சாம்சன் இடம் பெறுவாரா? என்பது குறித்து தகவல் வெளியாகி உள்ளது.

அதன்படி, சாம்பியன்ஸ் டிராபி தொடர் ஒருநாள் வடிவத்தில் நடப்பதால் சஞ்சு சாம்சனுக்கு வாய்ப்பு மறுக்கப்பட்டுள்ளதாக தகவல் வெளியாகி உள்ளது. மேலும் சாம்பியன்ஸ் டிராபி தொடருக்கு முன்பு இந்திய அணி இங்கிலாந்துக்கு எதிராக 5 போட்டிகள் கொண்ட டி20 தொடரிலும், 3 போட்டிகள் கொண்ட ஒருநாள் தொடரிலும் விளையாட உள்ளது. இதில் டி20 தொடரில் மட்டுமே சஞ்சு சாம்சன் இடம் பிடிப்பார் என தெரிகிறது.

இங்கிலாந்துக்கு எதிரான ஒருநாள் தொடரில் அவருக்கு வாய்ப்பு வழங்கபடாது எனவும் கூறப்படுகிறது. இங்கிலாந்துக்கு எதிரான தொடர் மற்றும் சாம்பியன்ஸ் டிராபி தொடருக்கான இந்திய அணியில் ரிஷப் பண்ட் மற்றும் கே.எல்.ராகுல் ஆகியோர் விக்கெட் கீப்பர்களாக இடம் பிடிப்பார்கள் என தகவல் வெளியாகி உள்ளது.