சி.ஐ.எஸ்.எப். வீரர்களின் தற்கொலை விகிதம் நடப்பு ஆண்டில் 40 சதவீதம் சரிவு

புதுடெல்லி,

2023-ம் ஆண்டில் மத்திய ஆயுத பாதுகாப்பு படையில் (சி.ஐ.எஸ்.எப்.) தற்கொலை விகிதம் 1 லட்சத்திற்கு 16.98 என்ற அளவில் இருந்தது. இந்த விகிதம் நடப்பு ஆண்டில் 40 சதவீதம் குறைந்து உள்ளது.

இதன்படி, 2024-ம் ஆண்டில் இந்த விகிதம் 1 லட்சத்திற்கு 9.87 என்ற அளவில் உள்ளது. மத்திய உள்விவகார துறை அமைச்சகத்தின் கீழ் செயல்படும் இந்த படையில் 5 ஆண்டுகளில் முதன்முறையாக இந்த விகிதம் குறைந்துள்ளது. இதனால் முக்கியதொரு மைல்கல்லை அடைந்து சி.ஐ.எஸ்.எப். சாதனை படைத்துள்ளது.

இதுபற்றி சி.ஐ.எஸ்.எப். வெளியிட்ட அறிக்கையில், 2024-ம் ஆண்டில் சி.ஐ.எஸ்.எப். வீரர்களில் 15 பேர் தற்கொலை செய்து உள்ளனர். இந்த எண்ணிக்கை 2023-ம் ஆண்டில் 25 ஆகவும், 2022-ம் ஆண்டில் , 2022-ம் ஆண்டில் 26 ஆகவும், 2021-ம் ஆண்டில் 21 ஆகவும், 2020-ம் ஆண்டில் 18 ஆகவும் இருந்தது.

வீரர்களின் நலன்களுக்காக, மனநல திட்டங்கள் மற்றும் மனஅழுத்த மேலாண்மை திட்டங்கள் ஆகியவற்றை சி.ஐ.எஸ்.எப். மேற்கொண்டு வருகிறது. அதன் பயனாகவே இந்த எண்ணிக்கை குறைந்துள்ளது என அதுபற்றிய சி.ஐ.எஸ்.எப். வெளியிட்ட அறிக்கை தெரிவிக்கின்றது.