தசைநார் பிரச்சினையால் ஏற்படும் வலியைக் குறைக்க உதவும் பயிற்சிகள்

உடலில் உள்ள தசைகளையும், எலும்புகளையும் இணைக்கக்கூடிய நார்த்தன்மையுள்ள இணைப்பு திசுக்களையே 'தசைநார்கள்' என்கிறோம். இதனை ஆங்கிலத்தில் 'லிகமென்ட்' என்று அழைக்கிறார்கள். தசைநார்கள் 'கொலாஜன்' எனும் புரதத்தால் ஆன இழைகளாகும். இவை அதிக வலிமையும், அதிர்வை தாங்கும் தன்மையும் கொண்டவை. உடலின் இயக்கத்துக்கு தசைநார்கள் முக்கியமானவை.

சில வேலைகளை செய்யும்போது சரியான தோற்ற நிலையை பின்பற்றாமல் இருந்தால் தசைநார்களில் பாதிப்பு ஏற்படும். இதனால் குறிப்பிட்ட சில இடங்களில் அதிக வலி உண்டாகும். அதை சில எளிய பயிற்சிகள் மூலம் குறைக்க முடியும். அதைப் பற்றிய குறிப்புகளை இங்கே பார்க்கலாம். மருத்துவரிடம் தகுந்த ஆலோசனை பெற்று இவற்றை செய்வது நல்லது.

ஹீல் ஸ்லைடு:

யோகா விரிப்பில் மல்லாந்து படுக்கவும். கழுத்து, முதுகுத்தண்டு, இடுப்பு மற்றும் குதிகால் இவை அனைத்தும் ஒரே நேர்கோட்டில் இருக்க வேண்டும். உள்ளங்கைகள் இரண்டையும் இடுப்பிற்கு பக்கவாட்டில் இருக்குமாறு தரையில் பதிக்கவும். இப்போது, முழங்கால்களை மடக்கி 5 வினாடிகளுக்கு அப்படியே வைத்திருக்கவும். பின்பு வலது காலை மட்டும் சற்று நீட்டி குதிகால் தரையில் படும்படி வைத்து பாதத்தை மேல்நோக்கி இருக்குமாறு வைக்கவும். இந்த நிலையில் 5 வினாடிகள் இருக்கவும். பின்னர் வலது காலை நீட்டி, குதிகாலை நேராக வைத்திருக்கவும். இந்த நிலையில் 5 வினாடிகள் இருந்து, பின்பு உடலை தளர்வாக்கவும். இவ்வாறு 10 வினாடிகள் இடைவெளியில் இந்த பயிற்சியை தொடர்ந்து 10 முறை செய்யவும்.

பலன்கள்:

குதிகால், தொடை எலும்புகள் வலுவாகும். முழங்காலைச் சுற்றியுள்ள தசைகள் மற்றும் திசுக்கள் சீராக செயல்படும். முதுகு வலி குறையும்.

வால் சிட் அல்லது வால் ஸ்குவாட்:

தலை, தோள்பட்டை, முதுகுத்தண்டு, இடுப்பு மற்றும் கணுக்கால் பகுதிகள் சுவரை ஒட்டியவாறு இருக்கும் நிலையில் நேராக நிமிர்ந்து நிற்கவும். பின்பு சுவரில் கீழ் முதுகுப்பகுதியை அழுத்தி, கால்களை முன்னோக்கி நகர்த்தவும். இப்போது உடலை சுவருடன் ஒட்டியவாறும், கால்களை நாற்காலி வடிவத்தில் இருக்குமாறும் வைக்கவும். இந்த நிலையில், உடலும், கால் அமைப்பும் ஆங்கில எழுத்து 'L' வடிவிலும், காலின் கீழ் அமைப்பு 90 டிகிரி அமைப்பிலும் இருக்க வேண்டும். இப்போது கைகளை தோள்பட்டைக்கு நேராக நீட்டவும். இந்த நிலையில் 20 வினாடிகள் இருந்து மீண்டும் பழைய நிலைக்கு வரவும். 10 வினாடிகள் இடைவெளியில், 3 செட் வீதம் காலை, மாலை என இரண்டு வேளையும் இந்த பயிற்சியை செய்யலாம்.

பலன்கள்:

உடலில் உள்ள தசைநார்களின் ஆரோக்கியத்தை மேம்படுத்தி, தசைப்பிடிப்பினால் ஏற்படும் வலியைக் குறைக்கும். உடலில் படிந்திருக்கும் தேவையற்ற கொழுப்பை எரித்து, உடல் எடையைக் கட்டுக்குள் வைக்க உதவும். உடலின் நெகிழ்வுத்தன்மையை மேம்படுத்தும்.