மற்ற அணிகள் வீரர்களை தேடுகின்றன...ஆனால் தோனி வீரர்களை உருவாக்குகிறார் - இந்திய முன்னாள் வீரர்

பெங்களூரு,

ஐபிஎல் தொடரில் நேற்று பெங்களூரில் நடைபெற்ற ஆட்டத்தில் சென்னை சூப்பர் கிங்ஸ் அணி 8 ரன் வித்தியாசத்தில் ராயல் சேலஞ்சர்ஸ் பெங்களூரு அணியை வீழ்த்தி தனது 3வது வெற்றியை பதிவு செய்தது. இந்த ஆட்டத்தில் முதலில் பேட்டிங் ஆடிய சென்னை அணி கான்வே, ஷிவம் துபே ஆகியோரின் அரைசதங்களின் உதவியுடன் 226 ரன் குவித்தது.

இந்நிலையில், மற்ற அணிகள் எல்லாம் வீரர்களை தேடுகிறது. ஆனால், தோனி வீரர்களை உருவாக்குகிறார் என இந்திய முன்னாள் வீரர் ஆகாஷ் சோப்ரா தெரிவித்துள்ளார். இது தொடர்பாக அவர் கூறும்போது,

பெங்களூருவுக்கு எதிராக ரகானே களத்தில் பேட் செய்த வரை அபாரமாக ஆடினார். துபேவும் சிறப்பாக பேட் செய்தார். அவர் இதற்கு முன்னர் ஆர்சிபி, ராஜஸ்தான் ராயல்ஸ் அணிகளுக்காக விளையாடி உள்ளார்.

மற்ற அணிகளுக்கும், தோனிக்கும் இருக்கும் வித்தியாசம் என்னவென்றால். மற்ற அணிகள் வீரர்களை தேடுகின்றன. தோனியோ தனது தலைமையின் கீழ் அவர்களுக்கு வளர வாய்ப்பு கொடுக்கிறார். அதன் மூலம் வளர்த்துவிடுகிறார்.

அவரது தலைமையின் கீழ் வீரர்களின் அபார செயல்பாட்டை பார்க்கவே அழகாக உள்ளது. மனதை கவர்கிறது. அதுவும் ரகானே புல் ஷாட்டில் சிக்ஸர் விளாசியது அருமை. கான்வே சுதந்திரமாக விளையாடுகிறார்.

இவ்வாறு அவர் கூறினார்.