ஜூனியர் 20 ஓவர் உலகக் கோப்பை கிரிக்கெட்: இந்திய அணி 2-வது வெற்றி

பெனோனி,

ஜூனியர் கிரிக்கெட்

பெண்களுக்கான முதலாவது ஜூனியர் 20 ஓவர் உலகக் கோப்பை கிரிக்கெட் போட்டி (19 வயதுக்குட்பட்டோர்) தென்ஆப்பிரிக்காவில் நடந்து வருகிறது. இதில் பங்கேற்றுள்ள 16 அணிகள் 4 பிரிவாக பிரிக்கப்பட்டுள்ளன. 'ஏ' பிரிவில் ஆஸ்திரேலியா, வங்காளதேசம், இலங்கை, அமெரிக்கா, 'பி' பிரிவில் இங்கிலாந்து, பாகிஸ்தான், ருவாண்டா, ஜிம்பாப்வே, 'சி' பிரிவில் அயர்லாந்து, இந்தோனேசியா, நியூசிலாந்து, வெஸ்ட் இண்டீஸ், 'டி' பிரிவில் இந்தியா, தென்ஆப்பிரிக்கா, ஐக்கிய அரபு அமீரகம், ஸ்காட்லாந்து ஆகிய அணிகள் இடம் பெற்றுள்ளன.

ஒவ்வொரு அணியும் தங்கள் பிரிவில் உள்ள மற்ற அணிகளுடன் தலா ஒரு முறை மோத வேண்டும். லீக் சுற்று முடிவில் ஒவ்வொரு பிரிவிலும் டாப்-3 இடங்களை பிடிக்கும் அணிகள் அடுத்த சுற்றை எட்டும்.

ஷபாலி 78 ரன்

தனது தொடக்க ஆட்டத்தில் தென்ஆப்பிரிக்காவை வீழ்த்திய இந்திய அணி நேற்று ஐக்கிய அரபு அமீரகத்தை பெனோனி நகரில் எதிர்கொண்டது. இதில் முதலில் பேட்டிங் செய்த இந்திய அணியில் தொடக்க ஆட்டக்காரர்களான கேப்டன் ஷபாலி வர்மா, சுவேதா செராவத் இருவரும் அமீரகத்தின் பந்து வீச்சை வெளுத்து வாங்கினர். மைதானத்தின் நாலாபக்கமும் பந்துகளை சிதறடித்த இவர்கள் முதல் விக்கெட்டுக்கு 111 ரன்கள் (8.3 ஓவர்) சேர்த்து அசத்தினர். ஷபாலி வர்மா 78 ரன்களில் (34 பந்து, 12 பவுண்டரி, 4 சிக்சர்) கேட்ச் ஆனார். தொடர்ச்சியாக 2-வது அரைசதம் அடித்த சுவேதா 74 ரன்களும் (49 பந்து, 10 பவுண்டரி), விக்கெட் கீப்பர் ரிச்சா கோஷ் 49 ரன்களும் (29 பந்து, 5 பவுண்டரி, 2 சிக்சர்) எடுத்தனர். 20 ஓவர்களில் இந்தியா 3 விக்கெட்டுக்கு 219 ரன்கள் குவித்தது.

பின்னர் களம் இறங்கிய அமீரக அணி 20 ஓவர்களில் 5 விக்கெட்டுக்கு 97 ரன்னில் கட்டுப்படுத்தப்பட்டது. அதிகபட்சமாக மஹிகா கவுர் 26 ரன்கள் எடுத்தார். இதன் மூலம் இந்தியா 122 ரன்கள் வித்தியாசத்தில் 2-வது வெற்றியை பெற்றதுடன் அடுத்த சுற்றுக்கும் முன்னேறியது. இந்தியா தனது கடைசி லீக்கில் ஸ்காட்லாந்தை நாளை சந்திக்கிறது.

ஆஸ்திரேலியாவுக்கு முதல் வெற்றி

மற்றொரு ஆட்டத்தில் தென்ஆப்பிரிக்கா 44 ரன் வித்தியாசத்தில் ஸ்காட்லாந்தை வென்றது.

'ஏ' பிரிவில் நடந்த ஒரு ஆட்டத்தில் அமெரிக்காவை 64 ரன்னில் சுருட்டிய ஆஸ்திரேலிய அணி 9 விக்கெட் வித்தியாசத்தில் முதலாவது வெற்றியை பெற்றது. இதே போல் வங்காளதேசம் 10 ரன் வித்தியாசத்தில் இலங்கையை பதம்பார்த்து 2-வது வெற்றியை சுவைத்தது.