ஐசிசி ஒருநாள் தரவரிசை; பேட்ஸ்மேன் வரிசையில் சுப்மன் கில் தொடர்ந்து முதலிடம்... விராட் கோலி முன்னேற்றம்!

துபாய்,

10 அணிகள் கலந்து கொண்ட 50 ஓவர் உலகக்கோப்பை கிரிக்கெட் தொடர் இந்தியாவில் சிறப்பாக நடைபெற்றது. இதில் இறுதிப்போட்டியில் இந்திய அணியை வீழ்த்தி ஆஸ்திரேலியா 6-வது முறையாக 50 ஓவர் உலகக்கோப்பையை வென்று வரலாறு படைத்தது.

உலகக்கோப்பை தொடர் முடிவடைந்த நிலையில் ஐசிசி வீரர்களுக்கான புதிய தரவரிசை பட்டியலை வெளியிட்டுள்ளது.

அதில் பேட்ஸ்மேன்கள் தரவரிசையில் இந்திய வீரர் சுப்மன் கில் தொடர்ந்து முதலிடத்தில் உள்ளார். பாபர் அசாம் 2-வது இடத்தில் தொடருகிறார். இந்த தொடரில் சிறப்பாக விளையாடிய விராட் கோலி 3-வது இடத்திற்கு முன்னேறியுள்ளார். இந்திய அணியின் கேப்டன் ரோகித் சர்மா 4-வது இடத்தில் உள்ளார். பேட்ஸ்மேன்கள் தரவரிசையில் முதல் 4 இடத்திற்குள் 3 இந்திய வீரர்கள் இடம்பெற்றுள்ளனர் என்பது சிறப்பம்சமாகும்.

பந்து வீச்சாளர்கள் தரவரிசையில் தென் ஆப்பிரிக்க வீரர் கேசவ் மகாராஜ் முதலிடத்தில் தொடருகிறார். ஆஸ்திரேலிய வீரர் ஜோஷ் ஹேசில்வுட் ஒரு இடம் முன்னேறி இந்திய வீரர் முகமது சிராஜை பின்னுக்கு தள்ளி 2-வது இடத்தை பிடித்துள்ளார். பந்து வீச்சாளர்கள் தரவரிசையில் இந்திய வீரர்களில் பும்ரா 4-வது இடத்திலும், குல்தீப் யாதவ் 7-வது இடத்திலும், முகமது ஷமி 10-வது இடத்திலும் உள்ளனர்.

ஆல் ரவுண்டர் தரவரிசையில் வங்காளதேச கேப்டன் ஷகிப் அல் ஹசன் மாற்றமின்றி முதலிடத்தில் தொடருகிறார். இதில் இந்திய வீரர் ஜடேஜா 10-வது இடத்தில் உள்ளார்.