கின்னஸ் சாதனை கோவில் - சுவாமி நாராயணன் அக்சர்தாம்

புதுடெல்லியின் முக்கிய நகரமான நொய்டாவில் யமுனை ஆற்றங்கரையின் ஓரத்தில் இந்த ஆலயம் அமைக்கப்பட்டிருக்கிறது. இந்த ஆலயம் 18-ம் நூற்றாண்டில் வாழ்ந்த, வைணவ ஞானியான சுவாமி நாராயணின் நினைவாக கட்டப்பட்டுள்ளது. இதனை சுவாமி நாராயணின் 3 ஆயிரம் தொண்டர்களும், 7 ஆயிரம் கைவினைத் தொழிலாளர்களும் சேர்ந்து கட்டமைத்துள்ளனர்.

இந்த ஆலயம் இரும்பு உள்ளிட்ட எந்த உலோகத்தையும் பயன்படுத்தாமல், ராஜஸ்தான் மாநிலத்தில் காணப்படும் இளஞ்சிவப்பு மணல்பாறை மற்றும் இத்தாலிய கர்ரரா சலவைக் கல் ஆகியவற்றைக் கொண்டு கட்டப்பட்டுள்ளது. சுவாமி நாராயணன் நினைவாக கட்டப்பட்ட இந்த நினைவுச் சின்னம் 141 அடி உயரம், 316 அடி அகலம், 370 அடி நீளம் கொண்டது.இந்த நினைவுச்சின்னத்தில் அலங்காரமாக செதுக்கப்பட்ட 234 தூண்கள், ஒன்பது குவிமாடங்கள், இந்து சமயத்தின் சாதுக்கள், பக்தர்கள், ஆச்சாரியார்கள் போன்றவர்களின் 20 ஆயிரம் சிலை உருவங்கள் காணப்படுகின்றன. அதோடு சுவாமி நாராயணன் சிலை 11 அடி உயரத்தில் நிறுவப்பட்டிருக்கிறது.

கோவில் வளாகத்தில் சுவாமி நாராயணின் வரலாறு காட்சிப்படுத்தப்பட்டுள்ளது. இங்கு 'நீலகண்ட கல்யாண யாத்ரா' என்ற ஆவணப்படம் திரையிடப்படுகிறது. இந்த நினைவுச்சின்னம், இந்தியாவின் ஆன்மிக தலங்கள், சடங்குகள், மரபுகள், கலாசாரம், திருவிழாக்கள் போன்றவை தொடர்பானது. இங்கே 'சான்ஸ்கருதி விகார்' என்ற பெயரில் படகு சவாரி வசதி செய்யப்பட்டுள்ளது. இதில் 12 நிமிடங்கள் பயணித்தால் 10 ஆயிரம் ஆண்டுகள் வரலாற்றை அறிந்து கொள்ளலாம். இதன் பாதை முழுவதும் தட்சசீலா, உலகின் முதல் பல்கலைக்கழகம், புராதன மருத்துவமனைகள் என இந்திய வரலாற்றை மாதிரிகளாக அமைக்கப்பட்டுள்ளன.

இந்திய பண்பாடு, வரலாற்றில் பங்களித்தவர்களின் சிற்பங்கள் இடம்பெற்றுள்ளன. மேலேஇருந்து பார்க்கும் போது, தாமரை வடிவில் தோட்டம் அமைந்துள்ளது. உலக அறிவு மேதை களின் பொன்மொழிகள் கற்களில் பொறிக்கப்பட்டுள்ளன. இன்னும் ஏராளமான அதிசயங்கள் நிறைந்துள்ள இந்த ஆலயம் கடந்த 2005-ம் ஆண்டு மக்கள் பார்வைக்காக திறக்கப்பட்டது. 2007-ம் ஆண்டு 'உலகின் மிகப்பெரிய அனைத்தும் கொண்ட இந்துக் கோவில்' என்று கின்னஸ் புத்தகத்திலும் இடம்பெற்றுள்ளது.