சிறுமிக்கு பாலியல் தொந்தரவு; பூசாரிக்கு 5 ஆண்டு சிறை

சிறுமிக்கு பாலியல் தொந்தரவு அளித்த பூசாரிக்கு 5ஆண்டு சிறை தண்டனை விதித்து கோர்ட்டு உத்தரவிட்டு உள்ளது.

பாலியல் தொந்தரவு

மதுரை அனுப்பானடி சின்னகண்மாய் சி.எம்.ஆர்.ரோடு பகுதியை சேர்ந்தவர் ராஜேந்திரன். இதே பகுதியில் உள்ள கோவிலில் பூசாரியாக இருந்தார். கடந்த 2018-ம் ஆண்டில் இவர் 15 வயது சிறுமிக்கு பாலியல் தொந்தரவு அளித்து உள்ளார்.

இதுகுறித்த புகாரின்பேரில் மதுரை மாநகர் அனைத்து மகளிர் போலீசார் வழக்குபதிவு செய்து, ராஜேந்திரனை கைது செய்தனர்.

5 ஆண்டு சிறை தண்டனை

இந்த வழக்கு விசாரணை மதுரை போக்சோ சிறப்பு கோர்ட்டில் விசாரிக்கப்பட்டது. அரசு தரப்பில் வக்கீல் ஜான்சிராணி ஆஜரானார். விசாரணை முடிவில், ராஜேந்திரன் மீதான குற்றச்சாட்டுகள் சந்தேகத்துக்கு இடமின்றி நிரூபிக்கப்பட்டன.

இதனால் அவருக்கு 5 ஆண்டு சிறை தண்டனையும், ரூ.25 ஆயிரம் அபராதமும் விதித்து நீதிபதி முத்துக்குமாரவேல் தீர்ப்பளித்தார். பாதிக்கப்பட்ட சிறுமிக்கு இழப்பீடாக ரூ.2 லட்சம் வழங்க வேண்டும் என்றும் நீதிபதி உத்தரவிட்டார்.