பொது விநியோக திட்டத்தின் கீழ் குடும்பத்திற்கு 2 கிலோ ராகி-கலெக்டர் சாந்தி தகவல்

தர்மபுரி:

பொது விநியோக திட்டத்தின் கீழ் சோதனை அடிப்படையில் மாதந்தோறும் ஒரு குடும்பத்திற்கு 2 கிலோ ராகி வழங்கப்படும் என்று கலெக்டர் சாந்தி தெரிவித்தார்.

வழிகாட்டு குழு கூட்டம்

தர்மபுரி மதிகோன்பாளையத்தில் உள்ள மாவட்ட வேளாண்மை ஒழுங்கு முறை விற்பனை கூட வளாகத்தில் குடும்ப அட்டைதாரர்களுக்கு பொது விநியோக திட்டத்தின் கீழ் ஊட்டச்சத்து பாதுகாப்பினை உறுதி செய்வதற்காகவும், நேரடியாக ராகி கொள்முதல் செய்வதற்காகவும் மாவட்ட அளவில் அமைக்கப்பட்டுள்ள வழிகாட்டு குழு கூட்டம் நடந்தது. கூட்டத்திற்கு மாவட்ட கலெக்டர் சாந்தி தலைமை தாங்கினார். இதில் வேளாண் விற்பனை அதிகாரிகள் மற்றும் விவசாயிகள் கலந்து கொண்டு இந்த திட்டம் குறித்து ஆலோசனைகளை வழங்கினர்.

அப்போது கலெக்டர் பேசியதாவது:-

தர்மபுரி மாவட்டத்தில் உள்ள குடும்ப அட்டைதாரர்களுக்கு பொது விநியோக திட்டத்தின் கீழ் ஊட்டச்சத்து பாதுகாப்பினை உறுதி செய்வதற்காக, சோதனை அடிப்படையில் ஒரு குடும்பத்துக்கு மாதம் அரிசிக்கு பதிலாக 2 கிலோ ராகி வழங்கப்படும். சிறு, குறு விவசாயிகள் நேரடியாக ராகி கொள்முதல் நிலையத்திற்கு சென்று பட்டா மற்றும் அடங்கல் ஆவணங்களுடன் இணைய வழி மூலமாக தங்கள் விவரங்களை பதிவேற்றம் செய்து ராகியை விற்பனை செய்து பயன்பெறலாம்.

நேரடியாக வங்கி கணக்கில்...

விவசாயிகள் தாங்கள் விற்பனை செய்த ராகிக்கு உண்டான தொகை வங்கி கணக்கில் நேரடியாக செலுத்தப்படும். சிறு, குறு விவசாயிகள் ராகி விற்பனை செய்வது தொடர்பான தங்களின்சந்தேகங்களை இதற்காக நியமிக்கப்பட்டுள்ள வட்டார வேளாண்மை அலுவலர்கள் மூலம் தொடர்பு கொண்டு நிவர்த்தி செய்யலாம். அதன்படி வட்டார வாரியாக தர்மபுரி-ரேவதி, நல்லம்பள்ளி-இளங்கோவன், பாலக்கோடு-மணிவண்ணன், காரிமங்கலம்-கனகராஜ், பென்னாகரம்-அன்பரசு, அரூர்-குமார், மொரப்பூர்-ராஜேஸ்வரி, பாப்பிரெட்டிப்பட்டி-ஜீவகலா ஆகியோர் நியமிக்கப்பட்டுள்ளனர்.

இவ்வாறு கலெக்டர்பேசினார்.

கூட்டத்தில் தர்மபுரி மாவட்ட வேளாண்மை இணை இயக்குனர் விஜயா, தமிழ்நாடு நுகர்பொருள் வாணிப கழக மண்டல மேலாளர் ராஜேந்திரன், தரக்கட்டுப்பாடு வேளாண்மை உதவி இயக்குனர் தாம்சன், தமிழக விவசாயிகள் சங்க மாநில தலைவர் சின்னசாமி மற்றும் தொடர்புடைய அலுவலர்கள், விவசாய சங்க பிரதிநிதிகள் மற்றும் விவசாயிகள் கலந்து கொண்டனர்.