பணம் கொடு்க்கல்-வாங்கல் தகராறு: டிரைவர் கத்தியால் குத்திகொலை; வாலிபர் கைது

தேனி மாவட்டம் உத்தமபாளையம் அருகே உள்ள காக்கில் சிக்கையன்பட்டியை சேர்ந்தவர் அமாவாசை (வயது 45). டிராக்டர் டிரைவர். இவர்,அதே ஊரை சேர்ந்த கருப்பையா மனைவி தேவி (36) என்பவருக்கு ரூ.2 ஆயிரம் கடனாக கொடுத்ததாக கூறப்படுகிறது. இந்நிலையில் அமாவாசை கொடுத்த பணத்தை கேட்க தேவியின் வீட்டுக்கு சென்றார். அப்போது இருவருக்கும் இடையே வாய்த்தகராறு ஏற்பட்டது.

இதையடுத்து அங்கு இருந்தவர்கள் அமாவாசையை சமாதானம் செய்து அனுப்பி வைத்தனர். இந்த நிலையில் கடந்த 15-ந்தேதி அமாவாசை மீண்டும் பணம் கேட்டு தேவி வீட்டுக்கு சென்றார். அப்போது இருவருக்கும் இடையே தகராறு ஏற்பட்டது. இதற்கிடையே வீட்டில் இருந்த தேவி மகன் சங்கர் (19) அமாவாசையை கத்தியால் குத்தினார். இதில் பலத்த காயம் அடைந்த அவரை அக்கம்பக்கத்தினர் மீட்டு சிகிச்சைக்காக உத்தமபாளையம் அரசு மருத்துவமனையில் சேர்த்தனர். இதுகுறித்து உத்தமபாளையம் போலீசார் வழக்குப்பதிவு செய்து விசாரணை நடத்தினர். இந்நிலையில் தேனி அரசு மருத்துவகல்லூரி மருத்துவமனையில் அனுமதிக்கப்பட்ட அமாவாசை சிகிச்சை பலனின்றி பரிதாபமாக இறந்தார். இதையடுத்து போலீசார் கொலை வழக்காக மாற்றி பதிவு செய்து சங்கரை கைது செய்தனர்.