மின்கம்பியாள் உதவியாளர் தகுதி தேர்வுக்கு விண்ணப்பிக்கலாம்

மின்கம்பியாள் உதவியாளர் தகுதி தேர்வுக்கு விண்ணப்பிக்கலாம் என்று மாவட்ட கலெக்டர் தெரிவித்துள்ளார்.

மின்கம்பியாள் உதவியாளர்

சிவகங்கை மாவட்ட கலெக்டர் மதுசூதன்ரெட்டி விடுத்துள்ள செய்திகுறிப்பில் கூறியுள்ளதாவது:-

வருகிற செப்டம்பர் 24 மற்றும் 25 ஆகிய தேதிகளில் மின்கம்பியாள் உதவியாளர் தகுதி தேர்வு நடைபெறவுள்ளது. இந்த தேர்விற்கு தகுதி வாய்ந்த கம்பியாள் உதவியாளர்களிடம் இருந்தும், மின்வாரியத்தால் நடத்தப்பட்ட தொழிலாளர்களுக்கான மாலைநேர வகுப்பில் மின்கம்பியாள் பிரிவில் பயிற்சி பெற்றுத் தேறியவர்களிடமிருந்தும் மற்றும் தேசிய புனரமைப்புத் திட்டத்தின் கீழ் இத்துறையால் நடத்தப்பட்ட மின்சாரப் பணியாளர் மற்றும் கம்பியாள் தொழிற்பிரிவுகளில் பயிற்சி பெற்றவர்களிடமிருந்து விண்ணப்பங்கள் வரவேற்கப்படுகின்றன.

விண்ணப்பிக்கலாம்

விண்ணப்பதாரர்கள் மின் வயரிங் தொழிலில் 5 வருடங்களுக்குக் குறையாமல் செய்முறை அனுபவம் உள்ளவராகவும், விண்ணப்பிக்கும் நாளில் 21 வயது நிரம்பியராகவும் இருத்தல் வேண்டும். அதிகபட்ச வயது வரம்பு இல்லை. இத்தேர்விற்குரிய விண்ணப்பப் படிவம் மற்றும் விளக்கக் குறிப்பேட்டினை https://skilltraining.tn.gov.in/DET/ என்ற இணையதளத்தில் சென்று பதிவிறக்கம் செய்து கொள்ளலாம்.

பூர்த்தி செய்யப்பட்ட விண்ணப்பங்களை தேர்வு மையங்களாக உத்தேசிக்கப்பட்டுள்ள அரசினர் தொழிற் பயிற்சி நிலையங்களில் ஒரு தொழிற் பயிற்சி நிலையத்தை விண்ணப்பதாரரே தேர்வு செய்து அத்தேர்வு மையத்திற்கு அனுப்ப வேண்டும். போதுமான விண்ணப்பங்கள் பெறப்படாத நிலையில் தேர்வு மையங்களில் பெறப்படும் விண்ணப்பங்கள் அருகிலுள்ள அரசு தொழிற் பயிற்சி நிலையத்திற்கு மாறுதல் செய்யப்பட்டு அங்கு தேர்வுகள் நடைபெறும்.

தேர்வு மையம் இறுதி செய்வதில் துறை தலைவரின் முடிவே இறுதியானது. பூர்த்தி செய்யப்பட்ட விண்ணப்பப் படிவங்கள் அரசினர் தொழிற் பயிற்சி நிலையங்களுக்கு ஜூலை 26-ந் தேதிக்குள் கிடைக்கும் வகையில் அனுப்ப வேண்டும்.

இவ்வாறு அவர் கூறியுள்ளார்.