திருச்சியில் நாளை மறுநாள் பிரசாரத்தை தொடங்குகிறார் முதல்-அமைச்சர் மு.க.ஸ்டாலின்

சென்னை,

நாடாளுமன்ற தேர்தல் வருகிற ஏப்ரல் 19-ந் தேதி நடைபெற உள்ளது. இதையொட்டி, தி.மு.க. தலைவரும், முதல்-அமைச்சருமான மு.க.ஸ்டாலின் தமிழ்நாடு முழுவதும் சுற்றுப்பயணம் மேற்கொண்டு இந்தியா கூட்டணி வேட்பாளர்களை ஆதரித்து தேர்தல் பிரசாரம் மேற்கொள்ள இருக்கிறார்.

இந்நிலையில், நாடாளுமன்ற தேர்தலுக்கான பிரசாரத்தை முதல்-அமைச்சர் மு.க.ஸ்டாலின் திருச்சியில் நாளை மறுநாள் தொடங்க இருப்பதாக தி.மு.க. தலைமை அலுவலகம் தெரிவித்து உள்ளது.

இதுதொடர்பாக தி.மு.க. தலைமை கழகம் வெளியிட்டுள்ள அறிக்கையில் கூறப்பட்டுள்ள முதல்-அமைச்சர் மு.க.ஸ்டாலினின் தேர்தல் பிரசார சுற்றுப்பயண விவரம் வருமாறு:-

திருச்சி, பெரம்பலூர் தொகுதியில் 22-ந் தேதி (நாளை மறுநாள்) வெள்ளிக்கிழமை பிரசாரம் செய்கிறார். அதைத் தொடர்ந்து, 23-ந் தேதி (சனிக்கிழமை) தஞ்சை, நாகை தொகுதிகளில் பிரசாரம் மேற்கொள்கிறார். 25-ந் தேதி (திங்கட்கிழமை) கன்னியாகுமரி, திருநெல்வேலியிலும்; 26-ந் தேதி (செவ்வாய்க்கிழமை) தூத்துக்குடி, ராமநாதபுரத்திலும், 27-ந் தேதி (புதன்கிழமை) தென்காசி, விருதுநகர் தொகுதியிலும் பிரசாரம் மேற்கொள்கிறார்.

தர்மபுரி, கிருஷ்ணகிரி தொகுதிகளில் 29-ந் தேதியும் (வெள்ளிக்கிழமை); 30-ந் தேதி (சனிக்கிழமை) சேலம், கள்ளக்குறிச்சியிலும்; 31-ந் தேதி (ஞாயிற்றுக் கிழமை) ஈரோடு, நாமக்கல், கரூர் ஆகிய தொகுதிகளிலும்; ஏப்ரல் 2-ந் தேதி (செவ்வாய்க்கிழமை) வேலூர், அரக்கோணம் தொகுதிகளிலும், 3-ந் தேதி (புதன்கிழமை) திருவண்ணாமலை, ஆரணி தொகுதிகளிலும்; 5-ந் தேதி (வெள்ளிக்கிழமை) கடலூர், விழுப்புரம் தொகுதிகளிலும் பிரசாரம் மேற்கொள்கிறார்.

சிதம்பரம், மயிலாடுதுறை தொகுதிகளில் 6-ந் தேதியும் (சனிக்கிழமை); 7-ந் தேதி (ஞாயிற்றுக்கிழமை) புதுச்சேரியிலும், 9-ந் தேதி (செவ்வாய்க்கிழமை) மதுரை, சிவகங்கையிலும், 10-ந் தேதி (புதன்கிழமை) தேனி, திண்டுக்கல் தொகுதிகளிலும், 12-ந் தேதி (வெள்ளிக்கிழமை) திருப்பூர், நீலகிரி தொகுதிகளிலும், 13-ந் தேதி (சனிக்கிழமை) கோவை, பொள்ளாச்சி தொகுதிகளிலும் பிரசாரம் செய்கிறார்.

திருவள்ளூர், வடசென்னை தொகுதிகளில் 15-ந் தேதியும் (திங்கட்கிழமை), 16-ந் தேதி (செவ்வாய்க்கிழமை) காஞ்சீபுரம், ஸ்ரீபெரும்புதூர் தொகுதிகளிலும், 17-ந் தேதி (புதன்கிழமை) தென்சென்னை, மத்திய சென்னை தொகுதிகளிலும் பிரசாரம் மேற்கொள்கிறார்.

முதல்-அமைச்சர் மு.க.ஸ்டாலின் மேற்குறிப்பிட்டுள்ள இடங்களில் பிரசாரத்திற்கு குறித்த நேரத்திற்குள் செல்ல வேண்டியுள்ளதால், காலத்தின் அருமை கருதி, எக்காரணம் கொண்டும் தி.மு.க. தொண்டர்கள், வழியில் வேறு எவ்வித நிகழ்ச்சிகளையும் ஏற்பாடு செய்திட வேண்டாம் என கண்டிப்புடன் கேட்டுக் கொள்ளப்படுகிறது.

இவ்வாறு அதில் கூறப்பட்டுள்ளது.