நல்லம்பள்ளி:
நல்லம்பள்ளி அருகே உள்ள சதையன்கொட்டாய் கிராமத்தை சேர்ந்தவர் மாணிக்கம்மாள் (வயது 75). இவர் நேற்று சனிச்சந்தை என்ற இடத்தில் தேசிய நெடுஞ்சாலையை கடந்த போது, அந்த வழியாக சென்ற அடையாளம் தெரியாத வாகனம் அவர் மீது மோதியது. இதில் தூக்கி வீசப்பட்டு, மூதாட்டி மாணிக்கம்மாள் படுகாயம் அடைந்தார். அவரை அந்த வழியாக சென்றவர்கள் மீட்டு சிகிச்சைக்காக தர்மபுரி அரசு ஆஸ்பத்திரிக்கு அனுப்பி வைத்தனர். அங்கு தீவிர சிகிச்சை அளித்தும் பலனின்றி மாணிக்கம்மாள் பரிதாபமாக இறந்தார். இந்த விபத்து குறித்து தொப்பூர் போலீசார் வழக்குப்பதிவு செய்து விசாரணை நடத்தி வருகிறார்கள்.