ஈரோட்டில் ஓடும் ஆம்புலன்சில் பெண்ணுக்கு பிரசவம்; அழகான ஆண் குழந்தை பிறந்தது

ஈரோடு கருங்கல்பாளையம் கே.ஏ.எஸ்.நகர் 5-வது வீதியை சேர்ந்தவர் சாதனாதேவி (வயது 25). இவருக்கு நேற்று திடீரென பிரசவ வலி ஏற்பட்டது. அவரை ஆஸ்பத்திரிக்கு அழைத்து செல்வதற்காக 108 ஆம்புலன்சுக்கு தகவல் கொடுக்கப்பட்டது. அதைத்தொடர்ந்து அங்கு வந்த ஆம்புலன்சில் சாதனாதேவி ஏற்றப்பட்டு, ஈரோடு அரசு ஆஸ்பத்திரிக்கு அழைத்து செல்லப்பட்டார். மூலப்பட்டறை பகுதியில் ஆம்புலன்ஸ் சென்று கொண்டிருந்தபோது பிரசவ வலி அதிகமானது. இதனால் டிரைவர் தமிழரசன் ஆம்புலன்சை சாலையோரமாக நிறுத்தினார். அதன்பிறகு மருத்துவ உதவியாளர் மகாதேவன் பிரசவம் பார்த்தார். இதில் சாதனாதேவிக்கு அழகிய ஆண் குழந்தை பிறந்தது. அதன்பிறகு தாயையும், பச்சிளம் குழந்தையையும் சிகிச்சைக்காக ஈரோடு அரசு ஆஸ்பத்திரியில் சேர்த்தனர்.