2 பெண்களிடம் நகை பறிப்பு

சங்கரன்கோவில்:

சங்கரன்கோவில் சங்கரநாராயண சுவாமி கோவிலில் கூட்ட நெரிசலை பயன்படுத்தி 2 பெண்களிடம் மர்ம நபர்கள் சங்கிலி பறித்துச் சென்றனர்.

கோவிலுக்கு சென்றனர்

சங்கரன்கோவில் ரெயில்வே பீடர் ரோடு பகுதியை சேர்ந்தவர் செண்பகம் என்பவருடைய மனைவி சீதாலட்சுமி (வயது 55). சங்கரன்கோவில் அருகே உள்ள ஆலமநாயக்கன்பட்டி ஊரைச் சேர்ந்தவர் அய்யலுசாமி என்பவருடைய மனைவி கீதாஞ்சலி (48).

இவர்கள் இருவரும் நேற்று முன்தினம் சங்கரன்கோவில் சங்கரநாராயண சுவாமி கோவிலில் நடைபெற்ற சனி பிரதோஷ விழாவை முன்னிட்டு சாமி தரிசனம் செய்ய சென்றனர்.

சங்கிலி பறிப்பு

அப்போது கூட்ட நெரிசலை பயன்படுத்தி சீதாலட்சுமி கழுத்தில் கிடந்த 38 கிராம் தங்கச் சங்கிலியையும், கீதாஞ்சலி கழுத்தில் இருந்த 22 கிராம் தங்கச் சங்கிலியையும் மர்ம நபர்கள் பறித்துச் சென்றனர்.

இதுகுறித்து சங்கரன்கோவில் டவுன் போலீசில் புகார் செய்யப்பட்டது. அதன் பேரில் போலீசார் வழக்குப்பதிவு செய்து விசாரணை நடத்தி மர்மநபர்களை வலைவீசி தேடி வருகின்றனர்.