மோட்டார்சைக்கிள் திருடிய 2 பேர் கைது

சூளகிரி

ஓசூர் மூக்கண்டப்பள்ளி என்.டி.ஆர். நகரை சேர்ந்தவர் சந்தோஷ்குமார் (வயது35). இவர் ஓசூரில் தனியார் நிறுவனத்தில் ஊழியராக பணியாற்றி வருகிறார். சம்பவத்தன்று அவர், சூளகிரியில் பேரிகை சாலையில் உள்ள கூட்டுறவு வங்கி அருகில் மோட்டார்சைக்கிளை நிறுத்தி இருந்தார். அப்போது அங்கு வந்த 2 பேர் மோட்டார் சைக்கிளை திருடி சென்றனர். இதை கவனித்த சந்தோஷ்குமார், அக்கம் பக்கத்தினர் உதவியுடன் அவர்கள் 2 பேரையும் பிடித்து சூளகிரி போலீசில் ஒப்படைத்தார். இதையடுத்து அவர்களிடம் போலீசார் விசாரணை நடத்தினர். அவர்கள் திருப்பத்தூர் மாவட்டம் வாணியம்பாடி அருகே உள்ள கோணமேடு பரமேஸ்வரன் நகரை சேர்ந்த தினேஷ்குமார் (20), பிரகாஷ் (23) என தெரிய வந்தது. இதையடுத்து அவர்கள் 2 பேரையும் போலீசார் கைது செய்தனர்.