மும்பையில் ஆக.,31-ல் எதிர்கட்சிகள் கூட்டம்: சோனியா காந்தி பங்கேற்பதாக தகவல்

மும்பை,

அடுத்த ஆண்டு ஏப்., - மே மாதங்களில் மக்களவை தேர்தல் நடைபெற உள்ளது. இதில், மத்தியில் ஆளும், தே.ஜ., கூட்டணி அரசை வீழ்த்த, காங்., - தி.மு.க., - திரிணமுல் காங்., உள்ளிட்ட கூட்டணி வைத்துள்ளன.

இந்த கூட்டணியின் முதல் ஆலோசனைக் கூட்டம் பீகாரின் பாட்னாவில் ஜூன் 23ல் நடந்தது. இதில் 16 எதிர்க்கட்சிகள் பங்கேற்றன. இக்கூட்டத்தை பீகார் முதல்-மந்திரியும் ஐக்கிய ஜனதா தள நிறுவனருமான நிதீஷ் குமார் ஏற்பாடு செய்தார். இதையடுத்து இரண்டாவது கூட்டம் கர்நாடகாவின் பெங்களூரில் நடந்தது. இதில் 26 எதிர்க்கட்சிகள் பங்கேற்ற நிலையில் கூட்டணிக்கு, 'இந்தியா' எனப்படும் இந்திய தேசிய வளர்ச்சி உள்ளடக்கிய கூட்டணி என்று பெயர் வைக்கப்பட்டது.

இதையடுத்து மராட்டிய மாநிலம் மும்பையில் எதிர்க்கட்சிகளின் மூன்றாவது ஆலோசனைக் கூட்டம் ஆக., 31 - செப்., 1 ஆகிய தேதிகளில் நடக்க உள்ளது. கூட்டத்தில் நாடு முழுவதும் இருந்து எதிர்க்கட்சி தலைவர்கள் கலந்து கொள்கின்றனர். கூட்டத்துக்கான ஏற்பாடுகள் தீவிரமாக நடந்து வருகிறது. இதில் காங்கிரஸ் கட்சி சார்பில் சோனியா காந்தி செப்.01-ம் தேதி நடக்க உள்ள இரண்டாவது நாள் கூட்டத்தில் பங்கேற்க உள்ளதாக மராட்டிய மாநில காங்., தலைவர், நானா படோல் தெரிவித்துள்ளார்.