லாரி சக்கரத்தில் சிக்கி இளம்பெண் பலி... முந்தி செல்ல முயன்றபோது பரிதாபம்

கோழிக்கோடு,

கேரள மாநிலம் கோழிக்கோடு மாவட்டம் பந்திரங்காவு அருகே மாத்தரா பகுதியை சேர்ந்தவர் அன்சிலா. இவர் தனது சகோதரருடன் மோட்டார் சைக்கிளில் பந்திரங்காவு அருகே தைபாலத்து என்ற இடத்தில் சென்று கொண்டு இருந்தார். மோட்டார் சைக்கிளை அவரது சகோதரர் ஓட்டினார். அப்போது முன்னால் சென்ற லாரியை அவரது சகோதரர் முந்தி செல்ல முயன்றார்.

ஆனால் லாரி டிரைவர் தனக்கு முன்னால் சென்ற ஒரு காரை முந்த முயன்றார். அந்த சமயத்தில் மோட்டார் சைக்கிளின் பக்கவாட்டில் லாரி மோதியது. இதில் மோட்டார் சைக்கிளில் இருந்து தவறி விழுந்த அன்சிலா, அந்த லாரியின் சக்கரத்தில் சிக்கினார். இதனால் உடல் நசுங்கி சம்பவ இடத்திலேயே அவர் பரிதாபமாக உயிரிழந்தார்.

அவரது சகோதரர் லேசான காயங்களுடன் உயிர் தப்பினார். இந்த சம்பவம் குறித்து கோழிக்கோடு போலீசாருக்கு சக வாகன ஓட்டிகள் தகவல் கொடுத்தனர். அதன்பேரில் விரைந்து வந்த போலீசார், அன்சிலாவின் உடலை மீட்டு பிரேத பரிசோதனைக்காக கோழிக்கோடு அரசு மருத்துவக்கல்லூரி மருத்துவமனைக்கு அனுப்பி வைத்தனர். மேலும் லாரி டிரைவரை கைது செய்து, தொடர்ந்து விசாரணை நடத்தி வருகின்றனர். லாரி சக்கரத்தில் சிக்கி இளம்பெண் பலியான சம்பவம் அப்பகுதியில் சோகத்தை ஏற்படுத்தி உள்ளது.