இந்தியாவின் புவிசார் அரசியல் மற்றும் பொருளாதார மாநாட்டில் பங்கேற்க ஐரோப்பிய ஆணைய தலைவர் டெல்லி வருகை

புதுடெல்லி,

ஐரோப்பிய ஆணைய தலைவர் ஏப்ரல் 24 மற்றும் 25ம் தேதிகளில் இந்தியா வருகிறார் என மத்திய வெளியுறவுத்துறை அமைச்சகம் தெரிவித்திருந்தது.

இந்நிலையில், ஐரோப்பிய ஆணைய தலைவர் உர்சுலா வொன் டெர் லியென் இன்று அதிகாலை தலைநகர் டெல்லி வந்தடைந்தார். அவருக்கு அதிகாரிகள் உற்சாக வரவேற்பு அளித்தனர். 

இந்தியா வந்துள்ள உர்சுலா வொன் டெர் லியென், ஜனாதிபதி ராம்நாத் கோவிந்த் மற்றும் பிரதமர் நரேந்திர மோடியை சந்தித்துப் பேச உள்ளார். அப்போது இருதரப்பு உறவுகள் குறித்து பேச்சுவார்த்தை நடத்துவார் என வெளியுறவுத் துறை தெரிவித்துள்ளது.

காலநிலை மாற்றம் மற்றும் பல்லுயிர் இழப்பு, ஆற்றல் மற்றும் டிஜிட்டல் மாற்றம், இணைப்பு, பாதுகாப்பு மற்றும் பாதுகாப்பு மற்றும் இந்தோ-பசிபிக் ஒத்துழைப்பு ஆகியவை அவரது பேச்சுவார்த்தையில் மையப் புள்ளியாக இருக்கும்.

தொடர்ந்து, அவர்  ‘எரிசக்தி மற்றும் வளங்கள் நிறுவனத்திற்கு(டெரி)’ செல்ல உள்ளார். அங்கு பருவநிலை மாற்றத்தின் சவால் மற்றும் பசுமையான, டிஜிட்டல் மற்றும் நெகிழ்ச்சியான எதிர்காலத்திற்காக இணைந்து செயல்பட வேண்டியதன் அவசியம் குறித்து அவர் இளைஞர்களுடன் உரையாடுவார். 

நாளை தொடங்க உள்ள  ‘ரைசினா மாநாட்டின்’ தலைமை விருந்தினராக ஐரோப்பிய ஆணையத்தின் தலைவர் அழைக்கப்பட்டுள்ளார்.  பிரதமர் மோடி ரைசினா மாநாட்டைத் தொடங்கி வைக்கிறார்.

இந்தியாவின் முதன்மையான மாநாடு ஆக கருதப்படும் இந்த சர்வதேச உரையாடலில், புவிசார் அரசியல் மற்றும்  பொருளாதாரம் பற்றி விவாதிக்கப்படும் . இந்நிகழ்ச்சியில் 90 நாடுகளில் இருந்து சுமார் 210 பிரதிநிதிகள் கலந்து கொள்கின்றனர்.