சர்ச்சைக்குரிய பேச்சு: மன்னிப்பு கோரினார் காங்கிரஸ் எம்.எல்.ஏ

பெங்களூரு,

கர்நாடக சட்டப்பேரவையில் நேற்று (வியாழக்கிழமை) விவசாயிகள் பிரச்சினை எழுப்பப்பட்டது. விவசாயிகள் பிரச்சினை குறித்து விரிவாக ஆலோசிக்க நேரம் ஒதுக்குமாறு காங்கிரஸ் எம்எல்ஏ.,க்கள் கோரிக்கை விடுத்தனர்.

அப்போது பேசிய சபாநாயகர் விஸ்வேஸ்வர ஹெக்டே, "அனைத்து உறுப்பினர்களும் பேச நேரம் ஒதுக்கினால் எப்படி அலுவல்களை மேற்கொள்வது. நீங்கள் என்ன முடிவு செய்தாலும் நான் ஆம் என்று தான் சொல்வேன். இப்போது இங்கு இருக்கும் நிலைமை என் கட்டுப்பாட்டை மீறிவிட்டது. இதை நான் சமாளிக்க முடியாது. அதனால் அமைதியாக நடப்பதை அனுபவிக்கலாம் என முடிவு செய்துவிட்டேன்” என்றார். 

அதற்கு பதிலளித்த காங்கிரஸ் எம்எல்ஏ கேஆர் ரமேஷ் குமார், "ஒரு சொலவடை இருக்கிறது. பாலியல் பலாத்காரத்தை தடுக்க முடியாவிட்டால் அமைதியாகப் படுத்து அனுபவிக்க வேண்டும் என்று. நீங்களும் அந்த நிலையில் தான் இருக்கிறீர்கள் " என சபாநாயகரைப் பார்த்துப் பேசினார். 

காங்கிரஸ் எம்.எல்.ஏவின் இந்த மோசமான கருத்து கடும் சர்ச்சையை ஏற்படுத்தியது. அவருக்கு எதிராக பல்வேறு தரப்பினரும் கண்டனங்கள் தெரிவித்தனர். எம்.எல்.ஏ. ரமேஷ் குமார் மன்னிப்பு கேட்க வேண்டும் என அவரது கட்சி உறுப்பினர்கள் உட்பட அனைத்து கட்சி உறுப்பினர்களும்  வலியுறுத்தினர். சமூக வலைத்தளங்களிலும் ரமேஷ்குமாரின் பேச்சுக்கு கடும் கண்டனங்கள் எழுந்தன. ரமேஷ்குமாரின் பேச்சு காங்கிரஸ் கட்சிக்கும் கடும் தர்மசங்கடத்தை ஏற்படுத்தியது. 

இந்த நிலையில், தனது பேச்சுக்கு மன்னிப்பு  கோருவதாக எம்.எல்.ஏ ரமேஷ்குமார் தெரிவித்துள்ளார். இது தொடர்பாக  தனது டுவிட்டரில் பதிவிட்டுள்ள  ரமேஷ் குமார் கூறியிருப்பதாவது:-  பாலியல் பலாத்காரம் பற்றி அலட்சியமாகவும், பொறுப்பின்றியும் நான் வெளியிட்ட கருத்துக்கு மன்னிப்பு கேட்டுக்கொள்கிறேன்.  கொடூரமான குற்றத்தை சிறுமைப்படுத்தும் எண்ணத்தில் நான் அவ்வாறு பேசவில்லை. எந்த முன்யோசனையும் இன்றி திடீரென அவ்வாறு பேசிவிட்டேன். இனிமேல்,  மிகவும் கவனமாகவே நான் பேசுவேன்” எனப்பதிவிட்டுள்ளார்.