திருவாரூர் மாவட்டத்தில் 68 நாட்களுக்கு பிறகு பஸ்கள் இயக்கம்

திருவாரூர், 

திருவாரூர் மாவட்டத்தில் 68 நாட்களுக்கு பிறகு பஸ்கள் இயக்கப்பட்டன.

பஸ்கள் இயக்கம்

கொரோனா வைரஸ் பரவுவதை தடுக்க மத்திய, மாநில அரசுகள் நடவடிக்கை எடுத்து வருகிறது. அதன்படி கடந்த மார்ச் மாதம் 25-ந் தேதி ஊரடங்கு அமல்படுத்தப்பட்டது. தற்போது 5-வது கட்டமாக ஊரடங்கு வருகிற 30-ந் தேதி வரை நீட்டிக்கப்பட்டுள்ளது. இதில் பல்வேறு தளர்வுகளை மத்திய, மாநில அரசுகள் அறிவித்துள்ளன.

அதன்படி 68 நாட்களுக்கு பிறகு திருவாரூர் மாவட்டத்தில் நேற்று பஸ் போக்குவரத்து தொடங்கியது. திருவாரூர் மாவட்டத்தில் திருவாரூர், நன்னிலம், திருத்துறைப்பூண்டி, மன்னார்குடி ஆகிய 4 பணிமனைகளில் இருந்து பஸ்கள் இயக்கப்பட்டன. குறைவான அளவில் பயணிகள் வந்ததால் பஸ் நிலையங்கள் வெறிச்சோடி காணப்பட்டன.