2-வது டி20: இலங்கை அணியை வீழ்த்தி தொடரை கைப்பற்றிய நியூசிலாந்து

மவுண்ட் மவுங்கானுய்,

இலங்கை கிரிக்கெட் அணி நியூசிலாந்தில் சுற்றுப்பயணம் மேற்கொண்டு 3 டி20 போட்டிகள் கொண்ட தொடரில் விளையாடி வருகிறது. இதில் நடைபெற்ற முதல் டி20 போட்டியில் நியூசிலாந்து வெற்றி பெற்று தொடரில் 1-0 என முன்னிலையில் இருந்தது.

இதனையடுத்து இவ்விரு அணிகளுக்கு இடையிலான 2-வது போட்டி இன்று நடைபெற்றது. இதில் டாஸ் வென்ற இலங்கை பந்துவீச்சை தேர்வு செய்தது.

அதன்படி முதலில் பேட்டிங் செய்ய களமிறங்கிய நியூசிலாந்து 20 ஓவர்கள் முடிவில் 5 விக்கெட்டுகளை இழந்து 186 ரன்கள் குவித்தது. அதிகபட்சமாக சாப்மேன் 42 ரன்களும், ராபின்சன் மற்றும் மிச்சேல் ஹே தலா 41 ரன்களும் அடித்தனர். இலங்கை தரப்பில் ஹசரங்கா 2 விக்கெட்டுகள் வீழ்த்தினார்.

பின்னர் 187 ரன்கள் அடித்தால் வெற்றி என்ற இலக்கை நோக்கி களமிறங்கிய இலங்கை அணியால் நியூசிலாந்து பந்துவீச்சை சமாளிக்க முடியவில்லை. அந்த அணியில் நிசங்கா மற்றும் குசல் பெரேரா தவிர மற்ற வீரர்கள் சொற்ப ரன்களில் ஆட்டமிழந்தனர்.

19.1 ஓவர்கள் மட்டுமே தாக்குப்பிடித்த இலங்கை அணி 141 ரன்களில் ஆல் அவுட் ஆனது. இதன் மூலம் 45 ரன்கள் வித்தியாசத்தில் வெற்றி பெற்ற நியூசிலாந்து 3 போட்டிகள் கொண்ட டி20 தொடரை 2-0 என்ற கணக்கில் கைப்பற்றியுள்ளது.

இலங்கை தரப்பில் அதிகபட்சமாக குசல் பெரேரா 48 ரன்களும், நிசங்கா 37 ரன்களும் அடித்தனர். நியூசிலாந்து தரப்பில் ஜேக்கப் டபி 4 விக்கெட்டுகள் வீழ்த்தினார்.