தொடர் கனமழை காரணமாக செங்கல்பட்டு-தாம்பரம் இடையேயான ரெயில் சேவையில் பாதிக்கப்பட்டுள்ளது. மழையின் காரணமாக ரெயில்கள் தாமதாக இயக்கப்படுவதாக ரெயில்வே துறை தெரிவித்துள்ளது. வழக்கமான நேர அட்டவணைப்படி இல்லாமல் குறைந்த அளவிலான மின்சார ரெயில்கள் இயக்கப்படுவதாக ரெயில்வே துறை அறிவித்துள்ளது.
▪️ சென்னை மற்றும் அதன் சுற்றுவட்டார பகுதிகளில் 100 சதவீதம் ஆவின் பால் விநியோகம் செய்யப்பட்டுள்ளது
▪️ கனமழை இருந்த போதிலும் பால் விநியோகத்தில் எந்த தடையும் ஏற்படவில்லை.
▪️ தொடர்ந்து மழை பெய்தாலும் பொதுமக்களுக்கு தடையின்றி பால் விநியோகம் செய்ய அனைத்து நடவடிக்கைகளும் மேற்கொள்ளப்பட்டுள்ளதாக ஆவின் நிர்வாக அதிகாரிகள் தகவல் தெரிவித்துள்ளனர்.
தொடர்ந்து வரும் கனமழையால் கிண்டி அருகே மடுவன்கரையில் மழைநீர் குளம்போல் தேங்கியதால் வாகன ஓட்டிகள் அவதி அடைந்துள்ளனர்.
சென்னையில் இருந்து 2 மணிக்கு மேல் மதுரை, திருச்சி, சேலம் செல்லும் இண்டிகோ விமான சேவை ரத்து செய்யப்படுவதாக இண்டிகோ ஏர்லைன்ஸ் விமான நிறுவனம் தெரிவித்துள்ளது. விமானங்களின் நேரங்களை மாற்றி அமைப்பது குறித்து ஆலோசித்து பின்னர் அறிவிக்கப்படும் என்று இண்டிகோ ஏர்லைன்ஸ் தரப்பில் கூறப்பட்டுள்ளது.
பெஞ்சல் புயல் காரணமாக சென்னை, செங்கல்பட்டு, காஞ்சிபுரம், திருவள்ளூர், வேலூர், திருவண்ணாமலை, ராணிப்பேட்டை விழுப்புரம் ஆகிய 8 மாவட்டங்களில் கனமழை தொடரும் என்று சென்னை வானிலை மையம் தெரிவித்துள்ளது.
கனமழை காரணமாக சென்னை விமானநிலையம் தற்காலிகமாக பகல் 1 மணி வரை ஓடுபாதை மூடப்படுவதாக அதிகாரிகள் தகவல் தெரிவித்துள்ளனர். விமானங்கள் தரையிறக்க முடியாத சூழலால் நடவடிக்கை எடுக்கப்பட்டுள்ளது. இன்று (நவ.30) மாலை 5 மணி வரை எந்த விமானங்களும் இயக்கப்படாது என அறிவிக்கப்பட்டுள்ளது.
சென்னையில் மழைநீர் தேங்கிய பகுதிகளில் உடனுக்குடன் வெளியேற்றப்பட்டு வருகிறது. சென்னை மாநகராட்சி சார்பில் அனைத்து முன்னெச்சரிக்கை நடவடிக்கைகளும் எடுக்கப்பட்டுள்ளன என்று சென்னை மேயர் பிரியா கூறியுள்ளார்.
புயல் காரணமாக கனமழை பெய்யும் அனைத்து மாவட்டங்களிலும் இன்று (நவ.30) திரையரங்குகள் இயங்காது என அறிவிக்கப்பட்டுள்ளது.
மழை முன்னெச்சரிக்கை காரணமாக காஞ்சிபுரத்தில் 21 கண்காணிப்பு குழுக்கள் அமைக்கப்பட்டுள்ளது.
புயல் மழை காரணமாக சென்னையில் இன்று 18 விமானங்கள் ரத்து செய்யப்பட்டுள்ளன. யாழ்ப்பானம், திருச்சி, தூத்துக்குடி செல்லும் விமானங்கள் ரத்து செய்யப்பட்டுள்ளன.