சியாட்டிகா நோய்க்கு சித்த மருத்துவம்

சியாட்டிகா என்பது சித்த மருத்துவத்தில் பேராசன நரம்பு தாபிதம் என்று அழைக்கப்படுகிறது. சியாட்டிக் நரம்பு என்பது நம் உடலிலே நீளமான நரம்பாகும், இது இடுப்பு தண்டுவடத்தில் எல் 4 பகுதியில் ஆரம்பித்து, பிட்டம், தொடையின் பின்புறம், முழங்காலுக்கு பின்னால் கால்களுக்கு பின்புறம் தசைநார்களுக்கு இடையே செல்கின்ற நரம்பு ஆகும்.இது வலது பக்கம் மற்றும் இடது பக்கம் என்று இரண்டு நரம்புகளாகும்.

சியாட்டிகா நோய்க்கான காரணங்கள்

1 ஹெர்னியேட்டட் இன்டர்வெர்டெபிரல் டிஸ்க் : முதுகெலும்புகள் ஒன்றோடொன்று உராய்வதைத் தடுப்பதற்கு எலும்புகளுக்கு இடையில் ஒரு தட்டையான குஷன் போன்ற வட்டு இருக்கும்.இந்த வட்டு அதன் இடத்திலிருந்து விலகி வெளியே வரும் போது, அருகிலுள்ள பகுதிகளில் அழுத்தத்தை கொடுக்கிறது, குறிப்பாக முதுகெலும்பின் நெடுவரிசையில் இருந்து உருவாகும் நரம்புகள் அழுத்தப்படுகிறது.

2 ஸ்பைனல் ஸ்டெனோசிஸ்: முதுகெலும்பு பாதையில் ஏற்படும் சுருக்கம் .

3 இடுப்பில் ஏற்படும் விபத்துகள், காயங்கள், எலும்பு முறிவு, அல்லது கட்டிகள்,

4 கர்ப்ப காலத்தில் ஏற்படும் எலும்புகளின் அசைவால் கூட இது ஏற்படும்.

மேற்கூறிய காரணங்களால் சியாட்டிக் நரம்பு அழற்சி அடைந்து வலி ஏற்படுகிறது.

சியாட்டிகாவின் குறிகுணங்கள் :

பிட்டம் பகுதியில் ஏற்படுகின்ற வலி தொடையின் பின்புறம், முழங்கால் மற்றும் காலின் பின்புறம் வரை நீடிக்கும்.

பாதிக்கப்பட்ட காலில் பலவீனம், கூச்ச உணர்வு, உணர்வின்மை மற்றும் எரியும் உணர்வு ஏற்படும். இரவில் அதிகமாக இருக்கும்,

சித்த மருத்துவம்

கீழ்கண்ட மருந்துகளை சித்த மருத்துவரின் ஆலோசனைப்படி எடுக்கலாம்.

1 அமுக்கரா சூரணம்-1 கிராம், சண்டமாருதம் -100 மிகி, முத்துச் சிப்பி பற்பம் -200 மிகி,குங்குலிய பற்பம் -200 மிகி இவைகளை மூன்று வேளை தேன் அல்லது வெந்நீரில் கலந்து சாப்பிட வேண்டும்.

2 இரச கந்தி மெழுகு காப்சூல்- காலை -1, இரவு -1 வீதம் சாப்பிட்டு வர வேண்டும்.

3.சிவப்பு குங்குலிய தைலம், விடமுட்டி தைலம்,வாத கேசரி தைலம்,வாத நாராயணன் தைலம் இவைகளில் ஒன்றை வலியுள்ள இடங்களில் தேய்த்து சிறிது நேரம் கழித்து வெந்நீரில் குளிக்க வேண்டும்.

4 உடற்பயிற்சி: தொடை,கால்களை உட்கார்ந்து நன்றாக நீட்டி கொள்ள வேண்டும், படுத்துக் கொண்டு கால்களை நெஞ்சை நோக்கி உயர்த்த வேண்டும், இவ்வாறு சிறிது நேரம் செய்து வர வேண்டும்.