ஓ.டி.டி.யில் வெளியாகும் 'பிளடி பெக்கர்' படம்

சென்னை,

தமிழ் சினிமாவில் வளர்ந்து வரும் இயக்குனர்களில் நெல்சன் திலிப்குமார் முக்கியமானவர். ரஜினிகாந்த் நடிப்பில் இயக்கிய ஜெயிலர் திரைப்படம் மிகப்பெரிய வரவேற்பை பெற்றது. அதை தொடர்ந்து சமீபத்தில் நெல்சன் 'பிலமண்ட் பிக்சர்ஸ்' என்ற பெயரில் தயாரிப்பு நிறுவனத்தை தொடங்கியுள்ளார். இந்த நிறுவனத்தின் தயாரிப்பில் வெளியான முதல் படம் 'பிளடி பெக்கர்'.

இந்த படத்தில் கவின் கதாநாயகனாக நடித்திருந்தார். இப்படத்தை நெல்சன் திலிப்குமாரிடம் உதவி இயக்குனராக பணியாற்றிய சிவபாலன் முத்துகுமார் இயக்கியுள்ளார். இப்படத்தில் கவினுடன் ரெடின் கிங்ஸ்லி, மாருதி பிரகாஷ்ராஜ், சுனில் சுகாதா, அக்சயா ஹரிஹரன் மற்றும் பலர் நடித்துள்ளனர். இதில் கவின் 'பிச்சைக்காரன்' கதாபாத்திரத்தில் நடித்திருந்தார். ஜென் மார்டின் இப்படத்திற்கு இசையமைத்துள்ளார்.

இப்படம் தீபாவளி பண்டிகையை முன்னிட்டு வெளியானது. டார்க் காமெடி கதைக்களத்தில் வெளியான இப்படம் கலவையான விமர்சனங்களையே பெற்றது. திரைப்படம் இதுவரை ரூ.10 கோடிக்கு மேல் வசூலித்துள்ளது. தற்பொழுது படத்தின் ஓ.டி.டி ரிலீஸ் குறித்த தகவல் வெளியாகியுள்ளது. அதன்படி இத்திரைப்படம் வருகிற 29-ந் தேதி அமேசான் பிரைம் ஓடிடி தளத்தில் வெளியாகவுள்ளது.