விம்பிள்டன் டென்னிஸ்: இறுதிப் போட்டியில் அல்காரஸ்-ஜோகோவிச் மோதல்

லண்டன்,

'கிராண்ட்ஸ்லாம்' என்ற உயரிய அந்தஸ்து பெற்ற விம்பிள்டன் டென்னிஸ் போட்டி லண்டனில் நடந்து வருகிறது. இதில் நேற்று நடந்த ஆண்கள் ஒற்றையர் அரைஇறுதி ஆட்டம் ஒன்றில் நடப்பு சாம்பியன் கார்லஸ் அல்காரஸ் (ஸ்பெயின்) 6-7 (1-7), 6-3, 6-4, 6-4 என்ற செட் கணக்கில் உலக தரவரிசையில் 5-வது இடத்தில் இருக்கும் மெட்விடேவை (ரஷியா) தோற்கடித்து தொடர்ந்து 2-வது முறையாக இறுதிப் போட்டிக்கு முன்னேறினார்.

இதைத் தொடர்ந்து மற்றொரு அரைஇறுதி ஆட்டத்தில் ஜோகோவிச் (செர்பியா) மற்றும் முசெட்டி (இத்தாலி) ஆகியோர் மோதினர். விறுவிறுப்பாக நடைபெற்ற இந்த ஆட்டத்தில் ஜோகோவிச் 6-4, 7-6(2), 6-4 என்ற செட் கணக்கில் முசெட்டியை வீழ்த்தி 10-வது முறையாக விம்பிள்டன் டென்னிஸ் இறுதிப் போட்டிக்குள் நுழைந்தார். இதையடுத்து நாளை நடக்கும் விம்பிள்டன் டென்னிஸ் இறுதிப் போட்டியில் அல்காரஸ் மற்றும் ஜோகோவிச் ஆகியோர் மோத உள்ளனர்.