கடலூரில் லாரியில் இரும்பு பொருட்கள் திருடிய வாலிபர் கைது

கடலூர் புதுநகர் சப்-இன்ஸ்பெக்டர் ரவிச்சந்திரன் தலைமையிலான போலீசார் கோண்டூர் பஸ் நிறுத்தம் அருகில் வாகன சோதனை மேற்கொண்டனர். அப்போது அங்கு சந்தேகத்திற்கிடமான வகையில் வாலிபர் ஒருவர் நின்று கொண்டிருந்தார். இதை பார்த்த போலீசார் அவரை பிடித்து விசாரணை நடத்தினர்.

விசாரணையில் அவர் கோண்டூரை சேர்ந்த பாரதி என்ற பாரதிராஜா (வயது 23) என்பதும், அவர் தனது நண்பருடன் சேர்ந்து கடந்த மாதம் 20-ந் தேதி நள்ளிரவு எஸ்.என்.சாவடி சிவசக்தி நகரை சேர்ந்த ரவி என்பவருக்கு சொந்தமான லாரியில் இருந்து 2 ஜாக்கிகள் மற்றும் இரும்பு பொருட்களை திருடியது தெரியவந்தது. அவற்றின் மதிப்பு ரூ.8 ஆயிரம் இருக்கும் என கூறப்படுகிறது. தொடர்ந்து போலீசார் வழக்குப்பதிவு செய்து பாரதியை கைது செய்தனர். மேலும் தலைமறைவாக உள்ள அவரது நண்பரை தேடி வருகின்றனர்.