பேரூர் அருகே அரசு பஸ்களை சிறைபிடித்த பெண்கள்

பேரூர்

கோவையை அடுத்த பேரூர் அருகே சிறுவாணி மெயின் ரோடு- பூலுவபட்டி பகுதியில் நேற்று காலை 9.30 மணிக்கு காந்திபுரம் செல்வதற்காக பெண்கள் பஸ்சுக்காக காத்திருந்தனர்.

அவர்கள் திடீரென்று அந்த வழியாக வந்த அரசு பஸ்சை சிறைபிடித் தனர். இதையடுத்து அவர்கள் சாலைமறியலில் ஈடுபட்டனர். அப்போது அந்த வழியாக காந்திபுரம் நோக்கி வந்த மேலும் 4 பஸ்களை சிறைபிடித்தனர்.

இது குறித்து தகவல் அறிந்த ஆலாந்துரை போலீசார் விரைந்துவந்து அவர்களிடம் பேச்சுவார்த்தை நடத்தினர். அப்போது, பொதுமக்கள் தரப்பில், கடந்த ஒரு வாரமாக பஸ்கள் குறிப்பிட்ட நேரத்திற்கு வருவதில்லை. இதனால் குறிப்பிட்ட நேரத்திற்கு வேலைக்கு செல்ல முடியாத நிலை உள்ளது.

மேலும், 2 நாட்களாக ஆலாந்துறை அரசு பள்ளியில் நிறுத்தத்தில் பஸ் நிற்காமல் சென்றது. இதனால் மாணவர்கள் பாதிக்கப்பட்டனர். இதனால் சாலைமறியலில் ஈடுபட்டோம் என்றனர்.

இதைத்தொடர்ந்து பொதுமக்களிடம் போலீசார் பேச்சுவார்த்தை நடத்தி காந்திபுரம் செல்ல இருந்த 4 பஸ், சாடிவயல் செல்ல இருந்த ஒரு அரசு பஸ் உள்பட மொத்தம் 5 அரசு பஸ்களை போலீசார் விடுவித்தனர். சாலைமறியல் காரணமாக அந்த ரோட்டில் ½ மணி நேரம் போக்குவரத்து பாதிக்கப்பட்டது. இதன் காரணமாக அங்கு பரபரப்பு ஏற்பட்டது.