லண்டன் சைக்கிள் போட்டியில் சாதனை படைத்த வேலூர் வீரர்கள்

இங்கிலாந்து தலைநகர் லண்டனில் 4 ஆண்டுகளுக்கு ஒருமுறை நெடுந்தொலைவு சைக்கிள் போட்டி நடக்கிறது. அந்த போட்டி கடந்த மாதம் நடந்தது. போட்டியில் இந்தியா சார்பில் 160 பேர் உள்பட பல்வேறு நாடுகளை சேர்ந்த 1,600-க்கும் மேற்பட்டோர் கலந்துகொண்டனர்.

லண்டனில் தொடங்கி ஸ்காட்லாந்து தலைநகரான இடின்பராக் வரை சென்று மீண்டும் லண்டனுக்கு திரும்பும் இப்போட்டியில் 1,540 கிலோ மீட்டர் தூரத்தை 128 மணிநேரத்திற்குள் கடக்கவேண்டும் என்பது விதியாகும். அதன்படி இப்போட்டியில் வேலூரை சேர்ந்த சைக்கிள் வீரர்கள் பிரமோத்குமார், ராஜ்குமார் ஆகியோர் கலந்து கொண்டு 125 மணிநேரத்தில் தூரத்தை கடந்து சாதனை படைத்தனர். இவர்களுக்கான பாராட்டு விழா வேலூர் மாவட்ட தி.மு.க. அலுவலகத்தில் நேற்று நடந்தது. மாவட்ட செயலாளர் ஏ.பி.நந்தகுமார் எம்.எல்.ஏ., அவர்களை பாராட்டி பேசினார்.

அப்போது சாதனை படைக்க வயது ஒரு தடை இல்லை. முதல்-அமைச்சர் மு.க.ஸ்டாலின், சைக்கிளில் சென்னையில் இருந்து மாமல்லபுரம் வரை செல்கிறார். சைக்கிள் போட்டியில் பங்கேற்று வேலூர் மாவட்டத்திற்கு பெருமை சேர்ந்த 2 பேரையும் பாராட்டுகிறேன். மேலும் பல்வேறு போட்டிகளில் வெற்றிபெற வாழ்த்துகிறேன் என்றார். தி.மு.க. சுற்றுச்சூழல் அணி மாநில துணை செயலாளர் வினோத்காந்தி வாழ்த்தி பேசினார். மாவட்ட ஊராட்சி குழு தலைவர் பாபு மற்றும் பலர் கலந்துகொண்டனர்.