சுற்றுலா தொழில்முனைவோர் விருது பெற விண்ணப்பிக்கலாம்

தஞ்சை மாவட்டத்தில் சுற்றுலா தொழில்முனைவோர் விருது பெற விண்ணப்பிக்கலாம் என்று கலெக்டர் தீபக்ஜேக்கப் கூறி உள்ளார்.

சுற்றுலா தொழில்முனைவோர்

தஞ்சை மாவட்ட கலெக்டர் தீபக்ஜேக்கப் விடுத்துள்ள செய்திக்குறிப்பில் கூறியிருப்பதாவது:-

தமிழ்நாட்டின் சுற்றுலாத்துறையுடன் தொடர்புடைய பல்வேறு சுற்றுலா தொழில் முனைவோருக்கு ஒவ்வொரு ஆண்டும் மாநில அளவிலான சுற்றுலா விருதுகளை வழங்கப்படும் என சட்டசபையில் அறிவிக்கப்பட்டது.. அதனடிப்படையில், தஞ்சை மாவட்டத்தில் உள்ள சுற்றுலா சம்மந்தமான தொழில் முனைவோர்களை ஊக்குவிக்கும் வகையில் இந்த விருதுக்கு விண்ணப்பிக்கலாம்.

சிறந்த சுற்றுலா ஏற்பாட்டாளர், சிறந்த உள்ளூர்-வெளியூர் சுற்றுலா வாகன ஏற்பாட்டாளர், பிரதான சுற்றுலா ஏற்பாட்டாளர். சிறந்த பயண. விமான பங்களிப்பாளர், சிறந்த தங்கும் விடுதி, உணவகம், சிறந்த வழிகாட்டி சாகச சுற்றுலா நிகழ்த்தியவர். சுற்றுலா தொடர்பான கூட்டம் மற்றும் மாநாடு அமைப்பாளர், சுற்றுலாவில் சமூக ஊடக தாக்கம் ஏற்படுத்தியவர். தமிழக சிறந்த சுற்றுலா விளம்பரம். சுற்றுலா ஊக்குவிப்பு மற்றும் விளம்பர கருத்து. சுற்றுலாவிருந்தோம்பல், சுற்றுலா தொடர்பான சிறந்த கல்வி நிறுவனம் ஆகிய பிரிவுகளை சேர்ந்தவர்கள் விண்ணப்பிக்கலாம். இதில் சிறப்பாக செயல்படுபவர்கள் மற்றும் சிறந்த நிறுவனங்களை தேர்ந்தெடுத்து உலக சுற்றுலா தினமான செப்டம்பர் 27-ந்தேதி விருது வழங்கப்பட உள்ளது.

விண்ணப்பிக்கலாம்

விருது வழங்கும் விழா நடைபெறும் இடம் பின்னர் அறிவிக்கப்படும். தஞ்சை மாவட்டத்தில் உள்ள சுற்றுலா தொழில்முனைவோர்கள் விருதுக்கான விண்ணப்பங்களை www.tntourismawards.com என்ற இணையதளத்தின் வாயிலாக பதிவிறக்கம் செய்து அடுத்த மாதம் (ஆகஸ்டு) 15-ந்தேதிக்குள் பூர்த்தி செய்து அனுப்புமாறு கேட்டுக்கொள்ளப்படுகிறது. மேலும், இதுதொடர்பான தகவல்களுக்கு 04362-230984 மற்றும் அலைபேசிஎண்.9176995873 தொடர்பு கொள்ளலாம்.

இவ்வாறு அதில் கூறப்பட்டுள்ளது.