தமிழ் இலக்கிய திறனை மேம்படுத்த பிளஸ்-1 மாணவர்களுக்கு திறனறி தேர்வு: விண்ணப்பிக்க நாளை கடைசி நாள்

தேனி தமிழ் வளர்ச்சித்துறை உதவி இயக்குனர் இளங்கோ வெளியிட்டுள்ள செய்திக்குறிப்பில் கூறியிருப்பதாவது:-

பள்ளி மாணவ, மாணவிகள் அறிவியல், கணிதம் சார்ந்த ஒலிம்பியாய்டு தேர்வுகளுக்கு பெருமளவில் தயாராகி வருவதைப் போன்று தமிழ் மொழி இலக்கிய திறனை மேம்படுத்திக் கொள்ளும் வகையில் அரசு தேர்வுகள் இயக்ககம் மூலம், திறனறி தேர்வு நடைபெற உள்ளது. 2022-23-ம் கல்வியாண்டில் அரசு பள்ளி மற்றும் அனைத்து வகை பள்ளிகளில் படிக்கும் பிளஸ்-1 மாணவ, மாணவிகள் இந்த தேர்வு எழுதலாம். இந்த தேர்வை எழுத www.dge.tn.gov.in என்ற என்ற இணையதள முகவரியில் நாளைக்குள் (வெள்ளிக்கிழமை) விண்ணப்பிக்க வேண்டும். 10-ம் வகுப்பு தமிழ் பாடம் இதற்கான பாடத்திட்டம் ஆகும். ஒரு கேள்விக்கு ஒரு மதிப்பெண் வீதம் 100 கேள்விகள் அடங்கிய வினாத்தாள் வழங்கப்படும். இந்த தேர்வு அடுத்த மாதம் (அக்டோபர்) 1-ந்தேதி நடக்கும். தேர்வுக்கு விண்ணப்பிப்பவர்கள் தேர்வுக்கான நுழைவுச்சீட்டை இணையதளம் மூலம் பதிவிறக்கம் செய்து கொள்ளலாம். இந்த தேர்வில் வெற்றி பெறும் 750 அரசு பள்ளி மாணவ, மாணவிகள், 750 இதர பள்ளி மாணவ, மாணவிகளுக்கு மாதம் ரூ.1,500 வீதம் 2 ஆண்டுகளுக்கு உதவித்தொகை வழங்கப்படும். இவ்வாறு அதில் கூறப்பட்டுள்ளது.