கியாஸ் சிலிண்டர் வெடித்து வீடு தரைமட்டம்; வாலிபர் படுகாயம்

தூத்துக்குடி அருகே கியாஸ் சிலிண்டர் வெடித்து வீடு தரைமட்டமானது. இந்த சம்பவத்தில் வாலிபர் படுகாயம் அடைந்தார்.

இதுகுறித்து போலீஸ் தரப்பில் கூறப்பட்டதாவது:-

வாலிபர்

தூத்துக்குடி அருகே உள்ள முடிவைத்தானேந்தல் அம்பேத்கர் காலனியை சேர்ந்தவர் முத்துக்குமார் (வயது 25). கடந்த 17-ந் தேதி இவர் தனது தாயார் உடல்நிலை பாதிக்கப்பட்டதால் வீட்டில் கியாஸ் அடுப்பில் வெந்நீர் போட்டு உள்ளார். பின்னர் தாயை ஆஸ்பத்திரிக்கு அவசரமாக அழைத்து சென்று விட்டார்.

அப்போது அடுப்பை அணைக்காமல் சென்று விட்டதாக கூறப்படுகிறது. இதில் வெந்நீர் கொதித்து வெளியேறி தீயை அணைத்தது. இதனால் சிலிண்டரில் இருந்து கியாஸ் வெளியேறி அறை முழுவதும் பரவியது.

வெடித்து சிதறியது

இந்த நிலையில் ஆஸ்பத்திரிக்கு சென்றுவிட்டு இரவில் வீட்டுக்கு முத்துக்குமார் வந்தார். அவர் வீட்டில் மின்விளக்கு சுவிட்சை போட்டார். அப்போது சுவிட்சில் இருந்து வந்த தீப்பொறியால் வீட்டில் பரவி இருந்த கியாஸ் தீப்பற்றி சிலிண்டர் வெடித்து சிதறியது.

இதில் வீட்டின் மேற்கூரை மற்றும் சுவர் இடிந்து தரைமட்டமானது. இதில் முத்துக்குமார் பலத்த காயம் அடைந்தார்.

போலீஸ் விசாரணை

இந்த சத்தம் கேட்டு அக்கம்பக்கத்தினர் ஓடி வந்தனர். படுகாயம் அடைந்த முத்துக்குமாரை மீட்டு சிகிச்சைக்காக தூத்துக்குடி அரசு ஆஸ்பத்திரியில் சேர்த்தனர். அங்கு அவருக்கு தீவிர சிகிச்சை அளிக்கப்பட்டு வருகிறது.

இந்த சம்பவம் குறித்து புதுக்கோட்டை போலீசார் வழக்குப்பதிவு செய்து தீவிர விசாரணை நடத்தி வருகிறார்கள்.