போலீசாருக்கு துப்பாக்கி சுடுதல் நினைவூட்டல் பயிற்சி

துப்பாக்கி சுடுதல் பயிற்சி

தர்மபுரி மாவட்டத்தில் பல்வேறு பணிநிலைகளில் 1,400 போலீசார் பணிபுரிந்து வருகிறார்கள். இவர்களுக்கு துப்பாக்கி சுடுதல் குறித்த நினைவூட்டல் பயிற்சி ஒவ்வொரு ஆண்டும் வழங்கப்படுகிறது.

இதன்படி துப்பாக்கி சூடுதல் நினைவூட்டல் பயிற்சி தொடங்கியது. ஆயுதப்படை போலீஸ் இன்ஸ்பெக்டர் செல்வமணி, மேற்பார்வையில் சப்-இன்ஸ்பெக்டர் சின்னசாமி மற்றும் குழுவினர் போலீசாருக்கு பயிற்சி அளித்தனர்.

ஆர்வத்துடன் பங்கேற்பு

10 நாட்கள் நடைபெற உள்ள இந்த பயிற்சி முகாமில் தினமும் 100 முதல் 150 போலீசாருக்கு துப்பாக்கி சுடுதல் பயிற்சி அளிக்கப்படுகிறது. அப்போது காவல்துறையில் பயன்படுத்தப்படும் துப்பாக்கி ரகங்கள், அந்த துப்பாக்கிகளை பயன்படுத்தும் முறை குறித்து பயிற்சி அளிக்கப்படுகிறது.

துப்பாக்கியை பிடிக்கும் விதம், சுடுவதற்கு தயாராகும் முறை, துப்பாக்கியை கையாள வேண்டிய வழிமுறைகள் குறித்தும் செயல் விளக்கத்துடன் பயிற்சி அளிக்கப்படுகிறது. ஒவ்வொரு போலீசாருக்கும் 3 சுற்றுகளில் 15 குண்டுகள் வழங்கப்படுகின்றன. அவற்றில் ஒவ்வொருவரும் எத்தனை குண்டுகளை உரிய இலக்கில் சுடுகிறார்கள் என்பது குறித்தும் கணக்கீடு செய்யப்படுகிறது.

இந்த துப்பாக்கி சுடுதல் நினைவூட்டல் பயிற்சியில் தர்மபுரி மாவட்டத்தை சேர்ந்த போலீசார் ஆர்வத்துடன் பங்கேற்று பயிற்சி பெற்றனர்.